குடிநீர் என்பது உயிரின் அடிப்படை என்பதுபோல, அந்த நீர் எவ்வளவு தூய்மையானது என்பதே உடல் ஆரோக்கியத்தின் உண்மையான அடையாளம். “நீர் குடித்தாலே போதும்” என்று நினைப்பதை விட, “எந்த நீர் குடிக்கிறோம்?” என்பதே இன்று மிகப் பெரிய கேள்வியாக மாறியுள்ளது.

காய்ச்சிய நீர், வடிகட்டிய நீர், பாட்டில் நீர் என பல தேர்வுகள் இருப்பதால், எது உடலுக்கு ஏற்றது என்ற குழப்பம் பலருக்கும் தவிர்க்க முடியாத ஒன்றாக உள்ளது. தோற்றத்தில் தெளிந்ததாகத் தெரியும் நீரிலும் கண்களுக்கு புலப்படாத பாக்டீரியா, வைரஸ், நுண்ணுயிர்கள் மறைந்திருக்க வாய்ப்பு அதிகம்.

அத்தகைய அபாயங்களை நீக்குவதற்காக நீரை கொதிக்கவைத்து பருகுவது பாரம்பரியமாக பாதுகாப்பான வழியாகக் கருதப்படுகிறது. குறைந்தது ஒரு நிமிடம் நன்கு கொதிக்கவைத்து வடிகட்டி குடித்தால், கிருமிகள் பெரும்பாலும் அழிந்து நீர் பாதுகாப்பாக மாறிவிடும். ஆனால் காய்ச்சுவதால் ரசாயன கலப்புகள், பூச்சிக்கொல்லிகள் போன்றவை நீங்காது; மேலும் நீரின் இயல்பான சுவையும் மாறக்கூடும்.

பெரிய குடும்பங்களுக்கு அல்லது தினசரி அதிக அளவில் பயன்படுத்த இது சற்று சிரமமான முறையாகவும் அமைகிறது.இதற்கு மாற்றாக பாட்டிலில் அடைக்கப்பட்ட குடிநீர் இன்று பரவலாகப் பயன்பாட்டில் உள்ளது. யூ.வி., ஆர்.ஓ., ஒசோன் போன்ற பல கட்ட சுத்திகரிப்பு முறைகள் கடந்து வரும் இந்த நீர் சுவையாகவும், உடனடியாகக் குடிக்க ஏற்றதாகவும் இருக்கும். ஆனால் எல்லா பாட்டில் நீரும் ஒரே தரம் கொண்டது அல்ல; சில நிறுவனங்களின் நீரில் தரம் குறைவாக இருக்கலாம்.

நீண்ட நாட்கள் பிளாஸ்டிக் பாட்டில்களில் வைத்திருந்தால், மைக்ரோபிளாஸ்டிக் நீரில் கலக்கும் அபாயமும் உண்டு. அதனால் பாட்டில் நீர் என்பது அவசர பயணங்களுக்கு ஏற்றது என்றாலும், தினசரி பழக்கமாக மாற்றுவது அவ்வளவு சிறந்தது அல்ல.அன்றாட வாழ்க்கைக்குப் பொருத்தமான தேர்வு என்றால், தரமான வடிகட்டிய நீரே மிகச் சிறந்த தீர்வாகக் கருதப்படுகிறது.

வீட்டில் நம்பகமான சுத்திகரிப்பு இயந்திரம் பொருத்தினால், கிருமிகள், மாசுக்கள், குளோரின் ஆகியவை நீக்கப்பட்டு சுவையும் சுத்தமும் ஒருங்கிணைந்த நீர் கிடைக்கும். குறிப்பாக ஆர்.ஓ. பயன்படுத்தும்போது, நீரில் இருக்கும் இயற்கை தாதுக்கள் முற்றிலும் அழியாத வகையில் மினரல் கார்ட்ரிட்ஜ் கொண்ட கருவிகளை தேர்வு செய்வது அவசியம்.

இருப்பினும், எல்லா வடிகட்டிகளும் ஒரே தரத்தில் செயல்படாது என்பதையும் நினைவில் கொள்ள வேண்டும். சரியான நேரத்தில் வடிகட்டிகளை சுத்தம் செய்யாதால் அல்லது மாற்றாதால், அதே கருவியே கிருமிகளின் தாயகமாக மாறிவிடும்.வெளியூர் பயணம், வேலைநேர அவசரம் போன்ற சூழ்நிலைகளில் நம்பகமான நிறுவனங்களின் பாட்டில் நீரை தேர்வு செய்வது பாதுகாப்பான முடிவு.

அல்லது வீட்டிலேயே காய்ச்சிய, வடிகட்டிய நீரை சுத்தமான பாட்டில்களில் எடுத்துச் செல்வதும் சிறந்த பழக்கம். எந்த வகை நீரானாலும், குடிப்பதற்கு முன் அதன் தூய்மையை உறுதி செய்வதும், பயன்படுத்தும் பாட்டில்களை நன்றாக கழுவி பராமரிப்பதும் மிகவும் முக்கியம்.

இறுதியில், உடலை காக்கும் மருந்து போலவே, சுத்தமான குடிநீரே தினசரி வாழ்க்கையின் உண்மையான காவலன் என்பதை மறக்காமல் நினைவில் வைத்துக் கொள்வதே நலம்.