தமிழகத்தில் அடுத்த ஆண்டு நடைபெறவுள்ள சட்டசபைத் தேர்தலை முன்னிட்டு அரசியல் சூடுபிடித்துள்ளது. அதிமுக–பாஜக கூட்டணி பிரசார யாத்திரைகள் தீவிரமடைந்துள்ள நிலையில், முன்னாள் பாஜக மாநிலத் தலைவர் அண்ணாமலையின் சமீபத்திய உரை பெரும் விவாதமாகியுள்ளது.

மதுரையில் நடைபெற்ற “தமிழகம் தலை நிமிர தமிழனின் பயணம்” என்ற முழக்கத்துடன் தொடங்கிய பாஜக மாநில தலைவர் நயினார் நாகேந்திரனின் தேர்தல் சுற்றுப்பயண தொடக்க விழாவில், மத்திய இணையமைச்சர் எல்.முருகன், தமிழிசை சௌந்தரராஜன், எச்.ராஜா, வானதி ஸ்ரீநிவாசன் உள்ளிட்ட பலர் கலந்து கொண்டனர்.

இந்த நிகழ்ச்சியில் பேசுகையில் அண்ணாமலை, சினிமா அரசியலை நேரடியாக சாடியதுடன், மறைமுகமாக நடிகர் விஜய்யை குறிவைத்து கூர்மையான விமர்சனம் செய்தார்.

அவரின் சொற்களில் —“உங்களுக்கு யாரை பிடிக்கிறதோ… சினிமா தியேட்டருக்குப் போங்க, விசிலடிங்க, படம் பாருங்க, வெளியே வாங்க… அதோட முடிந்துபோயிடும். சினிமாவில் நடிப்பவர்கள் நன்றாக ஆள்வார்கள் என்று நினைத்தால் — அது வேண்டாம்,” எனத் தெரிவித்தார்.

அண்ணாமலை தொடர்ந்து, “இந்த தேர்தலில் ஒவ்வொரு வாக்கும் முக்கியம். வாக்கு சிதறினால் திமுக மீண்டும் ஆட்சியைப் பிடிக்கும் அபாயம் உள்ளது. அதனால் தேசிய ஜனநாயக கூட்டணிக்கே வாக்குகள் திரட்டப்பட வேண்டும்,” என வலியுறுத்தினார்.

அவர் மேலும் கூறினார்:“10 ஆண்டுகள் மத்திய ஆட்சியும், 5 ஆண்டுகள் மாநில ஆட்சியும் பார்த்து வாக்களியுங்கள். திமுகவின் மனதில் வாக்கு பிளவால் மீண்டும் ஆட்சிக்கு வரலாம் என்ற அகங்காரம் இருக்கிறது. அதனை முறியடிக்க ஒவ்வொருவரும் வாக்குகளை ஒருங்கிணைக்க வேண்டும்,” என்றார்.

அண்ணாமலை தனது உரையில் தொண்டர்களுக்குச் செய்த அழைப்பும் கவனிக்கத்தக்கது.“இந்த யாத்திரை, கட்சியினரை மட்டும் கூடி தலைவரை பார்க்க வைப்பதற்காக அல்ல. கட்சியில் இல்லாதவர்களையும் கூட்டத்துக்கு அழைத்து வருங்கள். நயினார் நாகேந்திரன் பேசுவதை அவர்கள் கேட்கட்டும்; எடப்பாடி பழனிச்சாமி பேசுவதை அவர்கள் கேட்கட்டும். அதன்பின் அவர்களின் மனதை மாற்றுவது தான் தொண்டர்களின் கடமை,” எனத் தெரிவித்தார்.

அவரின் பேச்சின் இறுதியில், பெண்கள் மற்றும் குழந்தைகளின் பாதுகாப்பை முன்னிறுத்தி —“இங்கே குழந்தைகள் வந்தால் பாதுகாப்பாக செல்வார்கள் என்ற உறுதியை, பெண்கள் வந்தால் அவர்கள் பாதுகாப்பாக வீட்டுக்குச் செல்வார்கள் என்ற உறுதியை பாஜக மற்றும் தேசிய ஜனநாயக கூட்டணி வழங்குகிறது,” என்று கூறினார்.

 சினிமா அரசியலை சாடி, மக்கள் உணர்ச்சியைத் தொட்டு வாக்குகளை ஒருங்கிணைக்க வேண்டும் என்ற அழைப்புடன், அண்ணாமலையின் உரை தேர்தல் வெப்பத்தைக் கூட்டியுள்ளது.