கரூர் கூட்ட நெரிசல் சம்பவம் மற்றும் அதனைத் தொடர்ந்து முதலமைச்சர் விஜய் முன்வைத்த குற்றச்சாட்டுகள் தமிழக அரசியலில் தொடர்ந்து விவாதத்தை ஏற்படுத்தி வரும் நிலையில், மூத்த பத்திரிகையாளர் மணி தனது கருத்துகளை வெளிப்படுத்தியுள்ளார். கரூரில் விஜய் பேசிய சில கருத்துகள் அரசியல் ரீதியாக சரியானவை என்றும், முன்னாள் அமைச்சர்கள் தொடர்பான சில கேள்விகளுக்கு பதில் கிடைக்க வேண்டிய அவசியம் இருப்பதாகவும் அவர் தெரிவித்துள்ளார்.

பேட்டியில் பேசிய அவர், கரூர் சம்பவம் தொடர்பாக விஜய் பயன்படுத்திய அரசியல் மொழி அவரது ஆதரவாளர்களை ஈர்க்கும் வகையில் இருந்ததாகக் கூறினார். "கரூர் என்றாலே செந்தில் பாலாஜி குறித்த பழைய அரசியல் நினைவுகள்தான் மக்களுக்கு வருகிறது. கடந்த காலத்தில் செந்தில் பாலாஜி குறித்து ஸ்டாலினே கடுமையாக விமர்சித்தார். பின்னர் அதே நபரை அமைச்சரவையில் சேர்த்தது திமுகவின் அரசியல் முரண்பாடாகும்" என்றார்.

மேலும், திமுக முன்னாள் மத்திய அமைச்சர் ஆ. ராசாவை எடுத்துக்காட்டாகக் குறிப்பிட்ட அவர், "ஆ.ராசா மீது பல்வேறு விமர்சனங்கள் இருந்திருக்கலாம். ஆனால், விசாரணை அமைப்புகள் அழைத்தபோது அவர் ஒருபோதும் தலைமறைவாகவில்லை. சட்டத்தை எதிர்கொள்வதில் தயக்கம் காட்டவில்லை. அதுதான் ஒரு கட்சித் தொண்டனின் அணுகுமுறை. ஆனால் செந்தில் பாலாஜி ஏன் தலைமறைவாக இருக்கிறார் என்பது பலருக்கும் கேள்வியாக உள்ளது" என்று கூறினார்.

கரூரில் முதலமைச்சர் விஜய், "ஓடி ஒளிகிறார்கள்" என்று பேசியதை குறிப்பிட்ட மணி, அந்தக் கருத்து அரசியல் ரீதியாக தவறானது அல்ல என்றும், "செந்தில் பாலாஜி ஏன் வெளியில் வரவில்லை? அவருக்கு என்ன அச்சம்? இதுபோன்ற கேள்விகள் இயல்பாகவே எழுகின்றன. அந்த வகையில் விஜய் கூறியதில் தவறு எதுவும் இல்லை" என்றார்.

அதேபோல், "ஆட்சியைக் கவிழ்க்க ஏதாவது அரசியல் முயற்சி நடந்திருக்கலாம் என்ற சந்தேகம் எழுகிறது. இல்லையெனில் ஏன் இத்தனை பேர் கைது செய்யப்பட்டார்கள்? சிங்கப்பூரில் சிலருக்கு நீதிமன்ற நோட்டீஸ் வழங்கப்பட்டதாக தகவல்கள் வருகின்றன. ஐந்து நட்சத்திர ஹோட்டலில் நடைபெற்ற சந்திப்புகளின் காட்சிகள் அழிக்கப்பட்டதாகவும் பேசப்படுகிறது. இவை அனைத்தும் விளக்கம் அளிக்க வேண்டிய விஷயங்களாக உள்ளன" என்றும் அவர் கூறினார்.

மேலும், முன்னாள் அமைச்சர்கள் தொடர்பான விவகாரங்கள் குறித்து ஊடகங்கள் போதிய முக்கியத்துவம் அளிக்கவில்லை என்றும் அவர் விமர்சித்தார். "இரண்டு முன்னாள் அமைச்சர்கள் குறித்து பல்வேறு தகவல்கள் வெளியாகின்றன. ஆனால் அவை குறித்து பிரதான ஊடகங்களில் போதிய விவாதம் நடைபெறுவதில்லை. ஊடகங்கள் ஒருதலைப்பட்சமாக செயல்படுகின்றன என்ற விமர்சனம் அதிகரித்து வருகிறது" என்றார்.

ஊடகங்களின் செயல்பாடு குறித்தும் கருத்து தெரிவித்த மணி, "எந்த அரசியல் தலைவராக இருந்தாலும் அவர்களை ஒருமையில் பேசுவது பத்திரிகை தர்மத்திற்கு எதிரானது. பதவிக்குரிய மரியாதை எப்போதும் வழங்கப்பட வேண்டும். அதேசமயம், களத்தில் செய்தியாளர்கள் வெளியேற்றப்படும் சம்பவங்கள் நடந்தாலும், ஊடக நிறுவனங்கள் வலுவாக எதிர்ப்பதில்லை. பல ஊடக நிறுவனங்களுக்கு வேறு வணிக நலன்களும் இருப்பதால், அரசுக்கு எதிராகச் செயல்பட தயக்கம் காணப்படுகிறது" என்று தெரிவித்தார்.

இறுதியாக, "ஊடகங்கள் தங்களின் சுயாதீனத் தன்மையைப் பாதுகாக்கத் தவறியதாலேயே, பொதுமக்கள் மத்தியில் தங்களின் நம்பகத்தன்மையை இழக்கும் சூழல் உருவாகியுள்ளது" என்றும் அவர் தனது கருத்துகளை பதிவு செய்தார்.