2026 தமிழ்நாடு சட்டமன்றத் தேர்தலை முன்னிட்டு, காங்கிரஸ் கட்சியின் அரசியல் வியூகங்களில் முக்கிய மாற்றம் ஏற்பட்டுள்ளதாக தகவல்கள் வெளியாகியுள்ளன. இனி தமிழ்நாடு அரசியலில் நேரடியாக தலையிட்டு, கூட்டணி அரசியல், தொகுதி பங்கீடு, வேட்பாளர் தேர்வு உள்ளிட்ட அனைத்து முக்கிய முடிவுகளையும் ராகுல் காந்தியே முன்னெடுத்து நடத்த முடிவு செய்துள்ளதாக காங்கிரஸ் வட்டாரங்கள் தெரிவிக்கின்றன. டெல்லியில் நடைபெற்ற தமிழக காங்கிரஸ் கமிட்டி நிர்வாகிகளுடனான உயர்மட்ட ஆலோசனைக்குப் பிறகே இந்த முடிவு எடுக்கப்பட்டதாக கூறப்படுகிறது.

இந்தியாவின் பழமையான தேசிய கட்சியான காங்கிரஸ், பல மாநிலங்களில் ஆட்சியையும், பல மாநிலங்களில் வலுவான எதிர்க்கட்சித் தளத்தையும் கொண்டிருந்தாலும், தமிழ்நாட்டில் மட்டும் கடந்த பல தசாப்தங்களாக தனித்த அரசியல் சக்தியாக வளரத் தவறியுள்ளது. திமுக தலைமையிலான கூட்டணியில் ஒரு முக்கிய கட்சியாக இருந்தாலும், திமுகவின் ஆதரவால் மட்டுமே காங்கிரஸ் தேர்தல் வெற்றிகளைப் பெறுகிறது என்ற விமர்சனம் தொடர்ந்து முன்வைக்கப்பட்டு வருகிறது.

சட்டமன்றத் தேர்தலுக்கு இன்னும் சில மாதங்களே உள்ள நிலையில், திமுக கூட்டணியில் அதிக தொகுதிகள், ஆட்சியில் பங்கு உள்ளிட்ட கோரிக்கைகளை காங்கிரஸ் முன்வைத்து வருவதாக தகவல்கள் வெளியாகி வருகின்றன. இந்நிலையில், டெல்லியில் நடைபெற்ற காங்கிரஸ் உயர்மட்ட ஆலோசனைக் கூட்டம் தமிழக அரசியல் வட்டாரங்களில் பரபரப்பை ஏற்படுத்தியுள்ளது.

இந்த கூட்டத்தில் காங்கிரஸ் தலைவர் மல்லிகார்ஜுன கார்கே, முன்னாள் தலைவர் ராகுல் காந்தி தலைமையில் தமிழகத்தைச் சேர்ந்த எம்பிக்கள், எம்எல்ஏக்கள், மாநில நிர்வாகிகள், முன்னாள் தலைவர்கள் உள்ளிட்ட சுமார் 40 பேர் கலந்து கொண்டனர். இந்த சந்திப்பு வழக்கமான ஆலோசனைக் கூட்டமாக இல்லாமல், தமிழக காங்கிரசின் செயல்பாடுகளை தீவிரமாக ஆய்வு செய்த ஒரு “ஆபரேசன் மீட்டிங்” போலவே நடைபெற்றதாக கூறப்படுகிறது.

கூட்டத்தின் போது ராகுல் காந்தி, தமிழக காங்கிரஸ் தலைவர்களிடம் கடுமையான கேள்விகளை எழுப்பியதாக தகவல்கள் தெரிவிக்கின்றன. “கர்நாடகா, கேரளா, தெலங்கானா, புதுச்சேரி போன்ற தென்னிந்திய மாநிலங்களில் காங்கிரஸ் வளர்ந்துள்ளது. ஆனால் தமிழ்நாட்டில் மட்டும் ஏன் காங்கிரஸ் வளரவில்லை? கடந்த ஆண்டுகளில் நீங்கள் கட்சியை வளர்க்க என்ன செய்தீர்கள்?” என நேரடியாக கேள்வி எழுப்பியதாக கூறப்படுகிறது.

இந்த கேள்விகளுக்கு தமிழக காங்கிரஸ் தலைவர்கள் அளித்த விளக்கங்கள் ராகுல் காந்திக்கு திருப்தி அளிக்கவில்லை என்றும் தகவல்கள் வெளியாகியுள்ளன. குறிப்பாக, ஒரு பெண் காங்கிரஸ் எம்பியிடம் அவரது தொகுதியில் உள்ள பூத் ஏஜெண்ட்கள், பூத் கமிட்டிகள் செயல்பாடு குறித்து கேள்வி எழுப்பிய போது, தெளிவான பதில் கிடைக்காததால் ராகுல் காந்தி கடும் அதிருப்தி அடைந்ததாக கூறப்படுகிறது.

ஒருகாலத்தில் தமிழ்நாட்டில் ஆட்சி செய்த கட்சி காங்கிரஸ் என்பதும், 1967-ம் ஆண்டுக்கு முன்பு பக்தவச்சலம் முதலமைச்சராக இருந்ததும் நினைவுகூரப்படுகிறது. அதற்குப் பிறகு திமுக – அதிமுக அரசியல் ஆதிக்கம் தொடர்ந்த நிலையில், காங்கிரஸ் தனித்த அரசியல் சக்தியாக மீண்டும் எழ முடியாமல் போனதே இன்றைய நிலைக்கு காரணம் என அரசியல் பார்வையாளர்கள் கூறுகின்றனர். கடந்த சில ஆண்டுகளில் தமிழகத்தில் பாஜக வளர்ந்த அளவுக்கு கூட காங்கிரஸ் வளரவில்லை என்பதும், உட்கட்சி பூசல்களே காங்கிரசின் பலவீனத்திற்கு முக்கிய காரணம் என்பதும் கட்சிக்குள்ளேயே ஒப்புக்கொள்ளப்படும் உண்மையாக உள்ளது.

இந்த சூழ்நிலையை தீவிரமாக கவனத்தில் எடுத்துள்ள ராகுல் காந்தி, இனி தமிழ்நாடு காங்கிரசின் முழுப் பொறுப்பையும் நேரடியாக தன் கைகளில் எடுத்துக் கொள்ள முடிவு செய்துள்ளதாக தகவல்கள் தெரிவிக்கின்றன. கூட்டணி பேச்சுவார்த்தை முதல் வேட்பாளர் தேர்வு வரை அனைத்திலும் அவர் நேரடியாக ஈடுபட உள்ளார்.

அதற்கான ஆரம்பமாக, சமீபத்தில் அறிவிக்கப்பட்ட தமிழக காங்கிரஸ் மாவட்டத் தலைவர்கள் பட்டியல், முழுமையாக ராகுல் காந்தியின் கவனத்திற்கு எடுத்துச் செல்லப்பட்ட பின்னரே இறுதி செய்யப்பட்டதாக கூறப்படுகிறது. இளைஞர்களுக்கு வாய்ப்பு அளிக்கும் நோக்கில், சுமார் 70 மாவட்டத் தலைவர்களில் 60-க்கும் மேற்பட்டோர் புதிய முகங்களாக தேர்வு செய்யப்பட்டுள்ளதாக தகவல் வெளியாகியுள்ளது.

இதன் மூலம், 2026 தேர்தலைக் குறிவைத்து தமிழ்நாடு காங்கிரசின் அரசியல் வியூகங்கள் இனி ராகுல் காந்தியின் நேரடி மேற்பார்வையில் வடிவமைக்கப்படும் என்றும், மாநில அரசியலில் காங்கிரஸ் மீண்டும் ஒரு தீவிரமான சக்தியாக மாற முயற்சி தொடங்கியுள்ளதாகவும் அரசியல் வட்டாரங்கள் மதிப்பிடுகின்றன.