கொல்கத்தா ஆர்.ஜி. கர் மருத்துவக் கல்லூரியில் கடந்த 2024-ஆம் ஆண்டு ஆகஸ்ட் 9 அன்று முதுநிலை மருத்துவ மாணவி பாலியல் வன்கொடுமை செய்யப்பட்டு கொடூரமாகக் கொலை செய்யப்பட்ட வழக்கில், தற்பொழுது புதிய திருப்பமாக மறுவிசாரணை தொடங்கப்பட்டுள்ளது. இவ்வழக்கில் ஏற்கனவே சஞ்சய் ராய் என்ற சிவில் போலீஸ் தன்னார்வலருக்குக் கொல்கத்தா நீதிமன்றம் ஆயுள் தண்டனை விதித்துள்ள நிலையில், மேற்கு வங்கத்தின் புதிய முதலமைச்சர் சுவேந்து அதிகாரி இந்த வழக்கை மீண்டும் தீவிரமாக விசாரிக்க அதிரடி உத்தரவிட்டுள்ளார்.

மொபைல் சிக்னல் காட்டிய ரகசியம்:
உயிரிழந்த மாணவியின் தாயாரும், தற்போதைய பானிஹாட்டி தொகுதி பா.ஜ.க எம்.எல்.ஏ-வுமான ரத்னா தேவ்நாத், முன்னாள் முதல்வர் மம்தா பானர்ஜியின் குடும்பத்தினருக்கு இக்கொலையில் நேரடித் தொடர்பு இருப்பதாகப் பகிரங்கமாகக் குற்றம் சாட்டியுள்ளார். இதுதொடர்பாகப் பானிஹாட்டி முன்னாள் எம்.எல்.ஏ நிர்மல் கோஷ் மற்றும் நகராட்சித் தலைவர் சோம்நாத் தேவ் ஆகியோருக்கு விசாரணைக்கு ஆஜராக சம்மன் அனுப்பப்பட்டுள்ளது.

அபேஷ் பானர்ஜி மீதான சந்தேகம்: மம்தா பானர்ஜியின் மருமகனான அபேஷ் பானர்ஜிக்கு இக்கொலையில் நெருங்கிய தொடர்பிருப்பதாக ரத்னா தேவ்நாத் கூறியுள்ளார்.

நேரக் கணக்கு: பிரேதப் பரிசோதனை அறிக்கையின்படி கொலை நடந்த நள்ளிரவு 12 மணி முதல் காலை 6 மணி வரையிலான காலகட்டத்தில், அபேஷின் மொபைல் போன் சிக்னல் ஆர்.ஜி. கர் மருத்துவமனை வளாகத்திலேயே பதிவாகியிருந்ததைச் சுட்டிக்காட்டியுள்ள அவர், உடனடியாக அவரிடம் விசாரணை நடத்த வேண்டும் என வலியுறுத்தியுள்ளார்.

திட்டமிட்ட தடய அழிப்பு?
மாணவியின் தந்தை சேகர் ரஞ்சன் தேவ்நாத் மேலும் சில அதிர்ச்சியூட்டும் தகவல்களைப் பகிர்ந்துள்ளார். மம்தாவின் அண்ணன் கார்த்திக் பானர்ஜியின் மகனான அபேஷ் பானர்ஜி ஒரு மருத்துவர் ஆவார்.

தந்தையின் குற்றச்சாட்டு: "கொலை நடந்த அன்று இரவில் அபேஷ் சம்பவ இடத்திலேயே இருந்துள்ளார். அவரது உடலிலும் ஆடைகளிலும் ரத்தக்கறைகள் படிந்திருந்தன. மேலும், குற்றம் நடந்த இரவில் அப்போதைய கொல்கத்தா காவல் ஆணையர் வினீத் கோயலுடன் முன்னாள் முதல்வர் மம்தா பானர்ஜி தொடர்ந்து அலைபேசியில் தொடர்பில் இருந்தார். அதன் பிறகே, திட்டமிட்ட முறையில் வழக்கின் முக்கியத் தடயங்கள் அனைத்தும் அதிகாரப் பலத்தால் முழுமையாக அழிக்கப்பட்டன."

நீதிமன்றத் தீர்ப்பிற்குப் பிறகும், அரசியல் செல்வாக்கு மிக்கவர்களின் பின்னணி குறித்தும், தடயங்கள் மறைக்கப்பட்டது குறித்தும் பெற்றோரே நேரடியாகக் குற்றச்சாட்டுகளை முன்வைப்பது இவ்வழக்கில் மீண்டும் நாடு தழுவிய பரபரப்பை ஏற்படுத்தியுள்ளது.