சட்டமன்றத் தேர்தலுக்கு இன்னும் சில மாதங்களே உள்ள நிலையில், அதிமுக பொதுச்செயலாளர் எடப்பாடி கே. பழனிசாமி (இபிஎஸ்) தேர்தல் பணிகளில் அதிரடியாக களம் இறங்கியுள்ளார். வழக்கமான கட்சி நிர்வாகிகளின் தகவல்களை மட்டும் நம்பாமல், டெல்லியை தலைமையிடமாகக் கொண்ட முக்கிய அரசியல் வட்டாரங்கள் மற்றும் முன்னணி தனியார் ஆய்வு நிறுவனங்களின் உதவியுடன், தமிழ்நாடு முழுவதும் விரிவான பிரம்மாண்ட ‘கிரவுண்ட் சர்வே’ ஒன்றை அவர் தொடங்கியுள்ளதாக தகவல்கள் வெளியாகியுள்ளன.

அதிமுகவின் பலம் அதன் அடிமட்டத் தொண்டர்களே என்றாலும், உட்கட்சிப் பூசல்கள் மற்றும் பாரபட்சமான தகவல்களைத் தவிர்க்கும் நோக்கில் இந்த ரகசிய சர்வேயை இபிஎஸ் கையில் எடுத்துள்ளதாக கூறப்படுகிறது. இந்த சர்வே மூன்று முக்கிய அம்சங்களை மையமாகக் கொண்டு நடைபெறுகிறது.

முதலாவதாக, மக்களின் மனநிலை. திமுக அரசின் நலத்திட்டங்கள், குறிப்பாக மகளிர் உரிமைத் தொகை உள்ளிட்ட அறிவிப்புகள் குறித்து பொதுமக்களின் உண்மையான கருத்து என்ன, ஆளுங்கட்சி மீது எந்தெந்த பகுதிகளில் அதிருப்தி அதிகமாக உள்ளது என்பதைக் கண்டறிவதே இதன் நோக்கம்.

இரண்டாவதாக, வேட்பாளர் தேர்வு. ஒவ்வொரு தொகுதியிலும் செல்வாக்கு கொண்ட, மக்களிடம் நற்பெயர் பெற்ற, வெற்றி வாய்ப்பு அதிகம் உள்ள வேட்பாளர்கள் யார், தற்போதைய முன்னாள் அமைச்சர்கள் மற்றும் எம்.எல்.ஏ-க்களின் ‘ரேட்டிங்’ என்ன என்பதையும் இந்த ஆய்வு அலசுகிறது.

மூன்றாவதாக, கூட்டணி பலம். பாமக, பாஜக, தேமுதிக போன்ற கட்சிகளுடன் கூட்டணி அமைந்தால் அது வாக்குச் சதவீதத்தில் என்ன மாற்றத்தை ஏற்படுத்தும், குறிப்பாக நடிகர் விஜய்யின் தமிழக வெற்றிக் கழகம் (தவெக) எந்தெந்த மாவட்டங்களில் அதிமுக வாக்குகளைப் பறிக்கும் வாய்ப்புள்ளது என்பதும் சர்வேயில் முக்கிய கேள்விகளாக இடம் பெற்றுள்ளன.

தேசிய அளவில் தேர்தல் மேலாண்மையில் அனுபவம் பெற்ற டெல்லி நிறுவனங்களின் உதவியுடன், அதிமுக ஒரு நவீன ‘டிஜிட்டல் வார் ரூம்’ அமைத்துள்ளதாகவும் கூறப்படுகிறது. இதில் ஒவ்வொரு பூத் அளவிலும் சாதக–பாதகங்களை ஆய்வு செய்து, அதற்கேற்ப மைக்ரோ டார்கெட்டிங் அடிப்படையிலான பிரச்சார யுக்திகள் வகுக்கப்படவுள்ளன.

இந்த முறையில், வாரிசு அரசியல் அல்லது தனிப்பட்ட செல்வாக்கை விட, தரவுகள் காட்டும் ‘வின்னபிலிட்டி’ அடிப்படையிலேயே சீட் வழங்க வேண்டும் என்ற கொள்கையை இபிஎஸ் தீவிரமாக பின்பற்ற உள்ளதாகவும் அரசியல் வட்டாரங்கள் தெரிவிக்கின்றன. இதன் மூலம் பல தொகுதிகளில் புதிய முகங்களுக்கு வாய்ப்பு கிடைக்கலாம் என எதிர்பார்ப்பு எழுந்துள்ளது.

திமுகவின் பலம், மறுபுறம் விஜய்யின் அரசியல் வருகை என மும்முனைப் போட்டி சூழல் உருவாகி வரும் நிலையில், துல்லியமான கணக்கீடுகள் இன்றி தேர்தலை சந்திப்பது ஆபத்தானது என்பதை இபிஎஸ் உணர்ந்துள்ளதாகக் கூறப்படுகிறது. இந்த சர்வே முடிவுகள் வெளியான பின்னர், அதிமுகவின் இரண்டாம் கட்டத் தலைவர்கள், வேட்பாளர் பட்டியல் மற்றும் பிரச்சார யுக்திகளில் அதிரடி மாற்றங்கள் இருக்கும் என அரசியல் பார்வையாளர்கள் கணிக்கின்றனர்.