தமிழக சட்டசபைத் தேர்தலில் அதிமுக தலைமையிலான தேசிய ஜனநாயகக் கூட்டணியில் போட்டியிட்ட பாஜக, தாங்கள் களமிறங்கிய 27 தொகுதிகளின் நிலவரம் குறித்து விரிவான அறிக்கையை தொகுதி பொறுப்பாளர்களிடம் கேட்டுள்ளதாக தகவல்கள் வெளியாகியுள்ளன. தேர்தல் முடிவுகள் வெளியாகும் முன்பே தரைமட்ட தகவல்களை சேகரித்து அரசியல் மதிப்பீடு செய்யும் பணியில் பாஜக தலைமையகம் தீவிரமாக இறங்கியுள்ளதாக கூறப்படுகிறது.

2026 சட்டமன்றத் தேர்தலுக்காக அதிமுக-பாஜக கூட்டணி தேர்தலுக்கு ஒரு ஆண்டுக்கு முன்பே உறுதி செய்யப்பட்டிருந்தது. முதல்வர் வேட்பாளராக எடப்பாடி பழனிசாமி முன்னிறுத்தப்பட்ட நிலையில், தேசிய ஜனநாயகக் கூட்டணியில் பாஜகவுக்கு 27 தொகுதிகள் ஒதுக்கப்பட்டன.

இந்த தொகுதிகளில் 18 இடங்களில் பாஜக நேரடியாக திமுகவுடன் மோதியுள்ளதாகவும், இது கட்சிக்குப் பெரிய அரசியல் சவாலாக இருந்ததாகவும் கூறப்படுகிறது. கடந்த 2021 தேர்தலில் 20 தொகுதிகளில் போட்டியிட்டு 4 இடங்களில் வெற்றி பெற்ற பாஜக, இந்த முறை இரட்டை இலக்கத்தில் வெற்றி பெற வேண்டும் என்ற இலக்குடன் களமிறங்கியது.

இதற்காக தேசிய அளவிலான தலைவர்கள் பலர் தமிழகம் முழுவதும் தீவிர பிரச்சாரத்தில் ஈடுபட்டனர். பிரதமர் நரேந்திர மோடி, மத்திய உள்துறை அமைச்சர் அமித்ஷா, பாதுகாப்புத்துறை அமைச்சர் ராஜ்நாத் சிங் உள்ளிட்டோர் கூட்டணிக்காக வாக்கு சேகரித்தனர்.

ஏப்ரல் 23ஆம் தேதி ஒரே கட்டமாக நடைபெற்ற தேர்தலில் தமிழகத்தில் 85.15 சதவீத வாக்குகள் பதிவானது. இந்த அதிக வாக்குப்பதிவு எந்தக் கட்சிக்கு சாதகமாக அமையும் என்ற விவாதம் சூடுபிடித்துள்ள நிலையில், பாஜக தலைமையும் தங்களது உள்துறை ஆய்வை தீவிரப்படுத்தியுள்ளது.

இதற்காக ஒவ்வொரு தொகுதியின் தேர்தல் பொறுப்பாளர்களிடமும் பல்வேறு அம்சங்கள் குறித்து விரிவான தகவல்கள் கேட்கப்பட்டுள்ளதாக கூறப்படுகிறது. குறிப்பாக இளைஞர்கள் மற்றும் பெண்கள் எந்த அளவில் பாஜக வேட்பாளர்களுக்கு ஆதரவாக இருந்தனர், வாக்குப்பதிவு அதிகரிக்க காரணமான அம்சங்கள் என்ன, கூட்டணி கட்சிகளின் ஒத்துழைப்பு எந்த அளவில் கிடைத்தது, தமிழக வெற்றிக் கழகத்தின் தாக்கம் என்ன என்பன குறித்து அறிக்கை கோரப்பட்டுள்ளதாக தகவல்கள் தெரிவிக்கின்றன.

மேலும், ஒவ்வொரு தொகுதியிலும் பாஜக வேட்பாளர்களின் வாக்கு சதவீதம், வெற்றி வாய்ப்பு, எதிர்பார்க்கப்படும் வாக்கு வித்தியாசம் போன்ற விவரங்களும் தொகுக்கப்பட்டு டெல்லி தலைமையகத்துக்கு அனுப்பப்படவுள்ளதாக கூறப்படுகிறது.

தேர்தல் முடிவுகளுக்குப் பிறகும் இந்த அறிக்கைகள் தலைமையகத்தால் விரிவாக ஆய்வு செய்யப்படும் என்பதால், தொகுதி பார்வையாளர்கள் தரவுகளை மிகத் துல்லியமாகத் தயாரிக்க முயற்சித்து வருவதாக கட்சி வட்டாரங்கள் தெரிவிக்கின்றன.

தமிழகத்தில் தங்களது அரசியல் அடித்தளத்தை விரிவுபடுத்த வேண்டும் என்ற நீண்டகால திட்டத்தின் ஒரு பகுதியாகவே இந்தத் தேர்தலை பாஜக பார்க்கிறது. எனவே இறுதி முடிவுகள் மட்டுமின்றி, தொகுதி வாரியான தரைமட்ட அரசியல் மாற்றங்களையும் கட்சி தீவிரமாக மதிப்பீடு செய்து வருகிறது.