உத்தரபிரதேச மாநிலம் கிரேட்டர் நொய்டாவில் 7வது இந்திய நீர் வாரத்தை ஜனாதிபதி திரௌபதி முர்மு இன்று தொடங்கி வைத்தார். இந்நிகழ்வில் உத்தரபிரதேச முதல்வர் யோகி ஆதித்யநாத் மற்றும் ஆளுநர் ஆனந்திபென் படேல் ஆகியோர் பங்கேற்றனர்.

இந்நிகழ்வில் உரையாற்றிய ஜனாதிபதி, நீர் இல்லாத வாழ்க்கையை நினைத்துப் பார்க்க முடியாது. இந்திய நாகரிகத்தில், வாழ்க்கையிலும், வாழ்க்கைக்குப் பின் பயணத்திலும் தண்ணீர் முக்கியமானது. அதனால்தான் அனைத்து நீர் ஆதாரங்களும் புனிதமாக கருதப்படுகின்றன.

ஆனால், தற்போதைய நிலையைப் பார்த்தால், நிலைமை கவலைக்கிடமாக உள்ளது. அதிகரித்து வரும் மக்கள்தொகையால், நமது ஆறுகள் மற்றும் நீர்த்தேக்கங்களின் நிலை மோசமடைந்து வருகிறது, கிராம குளங்கள் வறண்டு வருகின்றன, பல உள்ளூர் ஆறுகள் அழிந்து வருகின்றன.

விவசாயம் மற்றும் தொழிற்சாலைகளில் தண்ணீர் அதிகமாக சுரண்டப்படுகிறது. பூமியில் சுற்றுச்சூழலின் சமநிலை சீர்குலைந்து, வானிலை மாறுகிறது மற்றும் பருவமற்ற அதிகப்படியான மழைப்பொழிவு பொதுவானதாகிவிட்டது. இத்தகைய சூழ்நிலையில், நீர் மேலாண்மை குறித்து விவாதிப்பது மிகவும் பாராட்டுக்குரிய நடவடிக்கையாகும்.

தண்ணீர் பிரச்சினை இந்தியாவிற்கு மட்டுமல்ல, முழு உலகிற்கும் பொருத்தமானது. பெருகி வரும் மக்கள்தொகைக்கு சுத்தமான குடிநீரை வழங்குவது வரும் ஆண்டுகளில் பெரும் சவாலாக இருக்கும். தண்ணீரை பயன்படுத்துவது மற்றும் மறு சுழற்சி செய்யும் நடவடிக்கைகள் மூலமே நீர்வளத்தை நீண்ட காலத்திற்கு தக்க வைக்க முடியும்.

நீர் வளத்தை கவனமாக கையாள அனைவரும் முயற்சிகளை மேற்கொள்ள வேண்டும். நீர் சேமிப்பு குறித்து மற்றவர்களுக்கும் விழிப்புணர்வை ஏற்படுத்த வேண்டும். பொதுமக்கள், விவசாயிகள், தொழில் அதிபர்கள் மற்றும் குழந்தைகள் நீர் சேமிப்பை தங்கள் வாழ்க்கை நெறிமுறைகளின் ஒரு பகுதியாக கடைபிடிக்க வேண்டும்.

இதன் மூலம் மட்டுமே இனி வரும் தலைமுறையினருக்கு சிறப்பான மற்றும் பாதுகாப்பான எதிர்காலத்தை நாம் பரிசளிக்க முடியும் என்று தெரிவித்துள்ளார்.