தமிழக சுகாதாரத் துறையில் தேர்வில் வெற்றி பெற்றும் பணிக்காக காத்திருக்கும் நூற்றுக்கணக்கான மருத்துவர்கள், தற்போது முக்கியமான கோரிக்கையுடன் முன்வந்துள்ளனர்.

மார்ச் 31க்குள் பணியில் சேர்ந்தால்தான், 2 ஆண்டுகள் சேவை முடித்து NEET மேற்படிப்பு தேர்வில் பங்கேற்க முடியும் என்பதால், உடனடி நியமன ஆணைகள் வழங்க வேண்டும் என அவர்கள் வலியுறுத்துகின்றனர்.

கடந்த ஜனவரி 25ஆம் தேதி நடைபெற்ற தேர்வின் மூலம் அரசு மருத்துவமனைகளுக்கு 1,100 உதவி மருத்துவர்களை தேர்வு செய்ய திட்டமிடப்பட்டது. இதில், சான்றிதழ் சரிபார்ப்பு முடிந்தபின் 1,071 பேர் தேர்வு செய்யப்பட்டனர்.

அதில் முதல் கட்டமாக சிலருக்கு மட்டுமே நியமன ஆணைகள் வழங்கப்பட்ட நிலையில், காலிப்பணியிடங்கள் இல்லாத காரணத்தால் 751 மருத்துவர்கள் இன்னும் காத்திருக்கின்றனர்.

இந்நிலையில், மருத்துவர்களின் எதிர்காலம் கேள்விக்குறியாகும் சூழல் உருவாகியுள்ளது. 2 ஆண்டுகள் அரசு சேவை என்பது NEET மேற்படிப்பு சேர்க்கைக்கான முக்கிய தகுதியாக இருப்பதால், இந்த தாமதம் அவர்களின் கல்வி முன்னேற்றத்தை நேரடியாக பாதிக்கும் அபாயம் இருப்பதாக தெரிவிக்கப்படுகிறது.

இதுகுறித்து மருத்துவர்கள் சங்கம் தெரிவித்ததாவது, "அரசு சேவை சாரா மருத்துவர்களை தற்காலிகமாக விடுவித்து, காலிப்பணியிடங்களில் காத்திருக்கும் மருத்துவர்களை நியமிக்க வேண்டும்.

மேலும், தேர்தல் காலம் என்பதால் இந்திய தேர்தல் ஆணையம் சிறப்பு அனுமதி பெற்று உடனடியாக நியமன ஆணைகள் வழங்கப்பட வேண்டும்" என வலியுறுத்தப்பட்டுள்ளது.

இந்த கோரிக்கை, மருத்துவர்களின் எதிர்காலத்தையும், சுகாதார அமைப்பின் தேவைகளையும் சமநிலைப்படுத்த வேண்டிய அவசியத்தை மீண்டும் நினைவூட்டுகிறது.