தமிழ் சினிமா மட்டுமல்ல, தென்னிந்திய திரையுலகமே மிஸ் செய்யும் நடிகைகளில் ஒருவர் ஷாலினி. குழந்தை நட்சத்திரமாக தொடங்கி முன்னணி நடிகையாக உயர்ந்த அவர், நடிகர் அஜித்தை திருமணம் செய்து கொண்ட பிறகு திரையுலகில் இருந்து விலகி குடும்ப வாழ்க்கையில் கவனம் செலுத்தி வருகிறார். சமீப காலமாக சில சினிமா நிகழ்ச்சிகளில் பங்கேற்று வரும் ஷாலினி, அண்மையில் நடந்த ஒரு விருது வழங்கும் விழாவில் அஜித் – விஜய் நட்பு குறித்து பேசியது ரசிகர்களின் கவனத்தை ஈர்த்துள்ளது.

அஜித் மற்றும் விஜய் இருவரும் கிட்டத்தட்ட ஒரே காலகட்டத்தில் திரைத்துறையில் அறிமுகமானவர்கள். ‘ராஜாவின் பார்வையிலே’ படத்தில் இருவரும் இணைந்து நடித்திருந்தனர். பின்னர் ‘நேருக்கு நேர்’ படத்தில் இணைந்து நடிக்க இருந்தாலும், அதிலிருந்து அஜித் விலகினார். அதன்பிறகு, தமிழ் சினிமாவில் இருவரும் தனித்தனியாக உயர்ந்து, முன்னணி நடிகர்களாக தங்களை நிலைநிறுத்திக் கொண்டனர்.

காலப்போக்கில், அஜித் – விஜய் படங்கள் ஒரே நாளில் வெளியாகும் சூழல் உருவாகி, ரசிகர்கள் மத்தியில் கடும் போட்டி நிலவியது. ரசிகர் மன்றங்களுக்கிடையிலான வாக்குவாதங்களும் பரபரப்பாக பேசப்பட்டன. எனினும், அஜித் தனது ரசிகர் மன்றங்களை கலைத்து, குடும்பத்தை முன்னிறுத்தும் முடிவை எடுத்தது குறிப்பிடத்தக்கது.

இந்த பின்னணியில், இருவருக்கிடையேயான தனிப்பட்ட உறவு குறித்து பல ஆண்டுகளாக ரசிகர்கள் மத்தியில் ஆர்வம் இருந்து வருகிறது. இதுகுறித்து ஷாலினி கூறியதாவது:“அஜித் மற்றும் விஜய் இருவருக்கும் இடையில் நல்ல நட்பு எப்போதுமே இருந்து வருகிறது. அவர்கள் ஒருவரின் வெற்றிக்கும், முன்னேற்றத்திற்கும் மற்றொருவர் மகிழ்ச்சியடைவார்கள்.”

ஷாலினியின் இந்த கருத்து, ரசிகர்கள் மத்தியில் நேர்மையான எதிர்வினையை ஏற்படுத்தியுள்ளது. திரையில் போட்டியாளர்களாக பார்க்கப்படும் இரண்டு முன்னணி நட்சத்திரங்கள், தனிப்பட்ட வாழ்க்கையில் நல்ல உறவை பேணி வருகிறார்கள் என்பதற்கான உறுதிப்பாடாக இந்த பேச்சு பார்க்கப்படுகிறது.

ரசிகர் போட்டிகளைத் தாண்டி, நட்பும் பரஸ்பர மரியாதையும் முக்கியம் என்பதைக் குறிப்பதாக ஷாலினியின் இந்த கருத்து சமூக வலைதளங்களில் பரவலாக பகிரப்படுகிறது.