தமிழகத்தில் வளிமண்டல மேலடுக்குச் சுழற்சிகள் தீவிரமடைந்துள்ளதால் பல மாவட்டங்களில் கனமழை மற்றும் பலத்த காற்றுக்கு வாய்ப்பு ஏற்பட்டுள்ளதாக சென்னை வானிலை ஆய்வு மையம் எச்சரிக்கை விடுத்துள்ளது. தென்கிழக்கு அரபிக்கடல் மற்றும் அதனை ஒட்டிய பகுதிகளில் சுமார் 5.8 கிலோமீட்டர் உயரத்தில் வளிமண்டல சுழற்சி நிலவி வருவதுடன், மத்தியகிழக்கு மற்றும் தென்கிழக்கு வங்கக்கடல் பகுதிகளின் மேல் 1.5 கிலோமீட்டர் முதல் 7.6 கிலோமீட்டர் உயரம் வரை மற்றொரு வளிமண்டல சுழற்சி செயல்பட்டு வருவதாக தெரிவிக்கப்படுகிறது.

இந்த வளிமண்டல மாற்றங்களின் தாக்கத்தால் இன்று (29-05-2026) தேனி, திண்டுக்கல், நீலகிரி, வேலூர், திருப்பத்தூர், கிருஷ்ணகிரி, தர்மபுரி மற்றும் ராணிப்பேட்டை மாவட்டங்களில் இடி, மின்னலுடன் கூடிய கனமழை பெய்யக்கூடும் என தெரிவிக்கப்படுகிறது. மேலும் மணிக்கு 40 முதல் 50 கிலோமீட்டர் வேகத்தில் பலத்த காற்றும் வீச வாய்ப்புள்ளதாக வானிலை ஆய்வு மையம் தெரிவித்துள்ளது.

இதனுடன், தமிழகத்தின் ஏனைய மாவட்டங்கள், புதுவை மற்றும் காரைக்கால் பகுதிகளிலும் லேசானது முதல் மிதமான மழை வரை பெய்யக்கூடும் என்றும் தெரிவிக்கப்படுகிறது.இந்நிலையில் இன்று காலை 10 மணி வரை திருவள்ளூர், சென்னை, செங்கல்பட்டு, காஞ்சிபுரம் மற்றும் கன்னியாகுமரி உள்ளிட்ட 7 மாவட்டங்களில் இடி, மின்னலுடன் கூடிய மழைக்கு வாய்ப்புள்ளதாக கூடுதல் தகவல் வெளியாகியுள்ளது.

இதனால் காலை நேரத்தில் பல பகுதிகளில் வானம் மேகமூட்டத்துடன் காணப்படக்கூடும் என தெரிவிக்கப்படுகிறது.சென்னை மற்றும் புறநகர் பகுதிகளில் இன்று வெப்பத்தின் தாக்கம் அதிகமாக இருக்கும் எனவும் எச்சரிக்கை விடுக்கப்பட்டுள்ளது. வானம் ஓரளவு மேகமூட்டத்துடன் காணப்பட்டாலும், அதிகபட்ச வெப்பநிலை 40 முதல் 41 டிகிரி செல்சியஸ் வரை பதிவாகக்கூடும் என்றும், குறைந்தபட்ச வெப்பநிலை 29 முதல் 30 டிகிரி செல்சியஸ் வரை இருக்கும் என்றும் தெரிவிக்கப்படுகிறது.

இதனால் வெப்பம் சார்ந்த உடல் அசௌகரியங்கள் பொதுமக்களுக்கு ஏற்பட வாய்ப்புள்ளதாகவும் தெரிவிக்கப்பட்டுள்ளது.இதற்கிடையில் மீனவர்களுக்கும் முக்கிய எச்சரிக்கை அறிவிப்பு வெளியிடப்பட்டுள்ளது. தமிழக கடலோரப்பகுதிகள், மன்னார் வளைகுடா மற்றும் குமரிக்கடல் பகுதிகளில் இன்று முதல் ஜூன் 1-ந் தேதி வரை சூறாவளிக்காற்று மணிக்கு 40 முதல் 50 கிலோமீட்டர் வேகத்தில் வீசக்கூடும் என்றும், இடையிடையே அதன் வேகம் 60 கிலோமீட்டர் வரை அதிகரிக்கக்கூடும் என்றும் தெரிவிக்கப்படுகிறது.

அதேபோல் தெற்கு வங்கக்கடல், மத்திய வங்கக்கடல் மற்றும் வடக்கு-தெற்கு அந்தமான் கடற்பகுதிகளிலும் அடுத்த சில நாட்களுக்கு கடல் சீற்றத்துடன் கூடிய பலத்த காற்று வீச வாய்ப்புள்ளதாக வானிலை ஆய்வு மையம் எச்சரித்துள்ளது.மேலும் தெற்கு அரபிக்கடலின் மையப்பகுதிகளிலும் இன்று முதல் 31-05-2026 வரை கடல் கடுமையாக காணப்படக்கூடும் என தெரிவிக்கப்படுகிறது.

இதனால் மேற்குறிப்பிட்ட பகுதிகளுக்கு மீனவர்கள் கடலுக்கு செல்ல வேண்டாம் என கடுமையான அறிவுறுத்தல் வழங்கப்பட்டுள்ளது.திடீர் வானிலை மாற்றங்கள் காரணமாக பொதுமக்கள் தேவையற்ற பயணங்களை தவிர்த்து பாதுகாப்புடன் இருக்க வேண்டும் என்றும், மீனவர்கள் வானிலை அறிவிப்புகளை தொடர்ந்து கவனிக்க வேண்டும் என்றும் சென்னை வானிலை ஆய்வு மையம் வலியுறுத்தியுள்ளது.