கடலூர் மாவட்டம் திட்டக்குடி அருகிலுள்ள மா.புடையூர் கிராமத்தைச் சேர்ந்த இளங்கோவனின் மகன் அஜித் (19), வேப்பூரை ஒட்டிய ஐவதுகுடியில் அமைந்துள்ள தனியார் பாலிடெக்னிக் கல்லூரியில் மூன்றாம் ஆண்டு படித்து வந்த திறமையான மாணவராக அறியப்பட்டார்.

இந்நிலையில், திட்டக்குடி தெப்பக்குளம் பகுதி அருகே நேற்று காலை தி.மு.க. வேட்பாளரை ஆதரித்து நடைபெற இருந்த பிரசாரக் கூட்டத்தில் கலந்து கொள்ள திருமாவளவன் வருகை தந்திருந்தார்.

இந்த கூட்டத்தை பார்ப்பதற்காக உற்சாகத்துடன் அஜித்தும் சென்றிருந்தார்.அந்தப் பகுதியில் கட்சி கொடிகள் கட்டப்பட்ட இரும்புக் கம்பிகள் சாலையோரம் நடப்பட்டிருந்தன. அவற்றில் ஒரு கம்பி, அருகிலிருந்த மின்மாற்றி (டிரான்ஸ்பார்மர்) கம்பியை ஒட்டியபடி அபாயகரமான நிலையில் இருந்ததாக தெரிவிக்கப்படுகின்றது.

இதை உணராமல் அஜித் அந்த இரும்புக் கம்பியை தொட்டவுடன், திடீரென மின்சாரம் தாக்கி அவர் பலத்த அதிர்ச்சியுடன் தூரத்திற்கு வீசப்பட்டார்.இந்த துயர சம்பவத்தை கண்ட அப்பகுதி மக்கள் உடனடியாக அஜித்தை மீட்டு, அவசரமாக திட்டக்குடி அரசு மருத்துவமனைக்கு கொண்டு சென்றனர்.

ஆனால், அங்கு பரிசோதனை செய்த மருத்துவர்கள், அவர் ஏற்கனவே உயிரிழந்துவிட்டதாக தெரிவிக்கப்படுகின்றது.இந்த திடீர் விபத்து செய்தி பரவியதும், திருமாவளவன் மற்றும் வேட்பாளர் கணேசன் மருத்துவமனைக்கு விரைந்து சென்று அஜித்தின் உடலை பார்வையிட்டு, துயரத்தில் மூழ்கிய குடும்பத்தினருக்கு ஆறுதல் தெரிவித்தனர்.

இச்சம்பவம் குறித்து திட்டக்குடி காவலர்கள் வழக்குப் பதிவு செய்து தீவிர விசாரணையில் ஈடுபட்டு வருகின்றனர்; அலட்சியமே இந்த உயிரிழப்புக்கு காரணமா என்ற கோணத்திலும் ஆராய்ந்து வருவதாக தெரிவிக்கப்படுகின்றது.