தென் ஆப்பிரிக்காவுக்கு எதிராக நடைபெற்ற கொல்கத்தா முதல் டெஸ்டில் 30 ரன்கள் வித்தியாசத்தில் இந்தியா தோல்வி கண்டது. இந்த தோல்விக்கான முக்கிய காரணமாக அதிகமாக சுழலும் பிட்ச் குறிக்கப்படுகிற நிலையில், பிளேயிங் லெவனில் நடந்த மாற்றங்களும் கடுமையாக விமர்சிக்கப்படுகின்றன.

மூன்றாவது இடத்தில் தொடர்ந்து விளையாடி வந்த சாய் சுதர்சனை திடீரென நீக்கி, அவரது இடத்தில் ஆல்ரவுண்டரான வாஷிங்டன் சுந்தரை களமிறக்க முடிவு எடுத்தது கௌதம் கம்பீரின் பெரிய தவறு என முன்னாள் வீரர்கள் பலரும் கூறி வருகின்றனர். இருந்தாலும் கடினமான பிட்சில் இரு இன்னிங்ஸிலும் 50க்கும் மேற்பட்ட பந்துகளை எதிர்கொண்ட ஒரே இந்திய பேட்ஸ்மேன் வாஷிங்டன் சுந்தர் என்பது குறிப்பிடத்தக்க சாதனையாக அமைந்தது.

இந்நிலையில் இந்திய முன்னாள் கேப்டன் சௌரவ் கங்குலி, சுந்தரின் திறமையை பாராட்டியதோடு, அவரை 3வது இடத்தில் பயன்படுத்துவது இந்திய அணிக்கு சரியான திட்டமல்ல என்று தெளிவாக எச்சரித்துள்ளார்.

கங்குலி கூறியதாவது:“வாஷிங்டன் சுந்தருக்கு இது ஒரு சிறப்பான கட்டம். அவர் பேட்டிங், பந்துவீச்சு இரண்டிலும் திறமையானவர். ஆனாலும் டெஸ்ட் கிரிக்கெட்டில் ஒவ்வொரு சூழ்நிலையிலும் 3வது இடத்தில் அவர் பொருந்துவார் என்று நான் நினைக்கவில்லை.”

அவர் மேலும் விளக்குகையில்:“இங்கிலாந்து, ஆஸ்திரேலியா, தென்னாப்பிரிக்கா போன்ற நாடுகளில் 3வது இடத்தில் விளையாட வேண்டியவர் ஒரு முழுநேர ஸ்பெஷலிஸ்ட் பேட்ஸ்மேன் தான். வாஷிங்டன் அங்கு அந்த பங்கு நிறைவேற்றுவார் என்று நம்ப முடியவில்லை. எனவே இந்த விஷயத்தில் கௌதம் கம்பீர் சிந்திக்க வேண்டும்.”

அதேபோல் கங்குலி, இந்தியாவில் நான்கு ஸ்பின்னர்கள் எடுக்க வேண்டிய அவசியமே இல்லை என்றும் கூறினார்:
“கொல்கத்தா போட்டியில் வாஷிங்டன் ஒரு ஓவர் மட்டும் வீசினார். பிட்ச் சுழலுக்கு சாதகமாக இருப்பின் உங்கள் முக்கிய ஸ்பின்னர்கள் 20–30 ஓவர்களை வீசி விக்கெட்டுகளை எடுப்பார்கள். அதற்கு நான்கு ஸ்பின்னர்கள் தேவையில்லை.”

இதன் மூலம் வாஷிங்டன் சுந்தரின் திறமையை சரியான இடத்தில் பயன்படுத்த வேண்டும் என்பதையும், தவறான ஸ்ட்ராடஜியால் அவரது திறமை வீணாகக் கூடாது என்பதையும் கங்குலி உறுதியாக தெரிவித்துள்ளார்.