ஐசிசி டி20 உலகக்கோப்பை கிரிக்கெட் தொடரின் பரபரப்பான இறுதிப் போட்டி நேற்று நடைபெற்றது. இந்த முக்கியமான ஆட்டத்தில் முதலில் பேட்டிங் செய்த இந்திய அணி அதிரடியான ஆட்டத்தை வெளிப்படுத்தி 20 ஓவர்களில் 255 ரன்கள் குவித்தது.

பெரும் இலக்கை விரட்டிய நியூசிலாந்து அணி இந்திய பந்துவீச்சாளர்களின் தீவிர தாக்குதலை சமாளிக்க முடியாமல் 159 ரன்களுக்கு ஆல் அவுட் ஆனது.

இதனால் 96 ரன்கள் என்ற அபார வித்தியாசத்தில் இந்தியா வெற்றி பெற்று டி20 உலகக்கோப்பையை கைப்பற்றியது.இந்த வெற்றியின் மூலம் இந்திய அணி மூன்றாவது முறையாக டி20 உலகக்கோப்பையை வென்று உலக கிரிக்கெட்டில் புதிய சாதனையை பதிவு செய்துள்ளது.

ந்திய வீரர்கள் வெளிப்படுத்திய இந்த அசத்தலான செயல்திறன் ரசிகர்களிடையே பெரும் கொண்டாட்டத்தை ஏற்படுத்தியுள்ளது.இந்திய அணியின் இந்த வரலாற்று சாதனைக்கு முன்னாள் கிரிக்கெட் ஜாம்பவான்களும் தற்போதைய நட்சத்திரங்களும் சமூக வலைதளங்கள் மூலம் வாழ்த்துகளை பொழிந்து வருகின்றனர்.

அந்த வகையில் இந்திய கிரிக்கெட்டின் புராண நாயகன் சச்சின் டெண்டுல்கரும் தனது பாராட்டை தெரிவித்துள்ளார்.இதுகுறித்து அவர் தெரிவித்ததாவது,"டி20 வடிவத்தில் உலகக்கோப்பையை தொடர்ந்து இரண்டு முறை வெல்வது எந்த அணிக்கும் இதுவரை சாத்தியமாகாத சாதனை.

அந்த பெருமையை இந்திய அணி இன்று உருவாக்கியுள்ளது. இந்த கோப்பையை வெல்ல முழுமையாக தகுதியான அணியாக இந்தியா திகழ்ந்தது. அணியின் ஒற்றுமை, திறமை மற்றும் ஆட்டத்தின் தரம் அனைத்தும் கிரிக்கெட்டின் உண்மையான அழகை உலகிற்கு காட்டியுள்ளன. ஜெய் ஹிந்த்!” என பாராட்டினார்.

இதனைத் தொடர்ந்து இந்திய முன்னாள் கேப்டன் விராட் கோலியும் தனது வாழ்த்துகளை தெரிவித்துள்ளார்.அவர் தெரிவித்ததாவது,"சாம்பியன்கள்! அகமதாபாத்தில் இந்திய அணிக்கு கிடைத்த இந்த அபார வெற்றி உண்மையில் மறக்க முடியாதது.

போட்டி முழுவதும் அதிரடி கிரிக்கெட்டை வெளிப்படுத்திய வீரர்கள் கடினமான சூழ்நிலைகளிலும் மன உறுதியுடன் போராடி மீண்டும் உலக சாம்பியன்களாக மாறியுள்ளனர்.

இந்த மகத்தான சாதனையை நிகழ்த்திய அனைத்து வீரர்களுக்கும் மற்றும் நிர்வாக குழுவின் ஒவ்வொரு உறுப்பினருக்கும் எனது மனமார்ந்த வாழ்த்துக்கள். ஜெய் ஹிந்த்!” என அவர் குறிப்பிட்டுள்ளார்.