தமிழகத்தின் பல பகுதிகளில், உடல் மற்றும் மன நலக் குறைகளை தீர்க்கும் அருள்தலங்களாக பக்தர்கள் நம்பிக்கையுடன் தரிசிக்கும் கோவில்கள் பல உள்ளன. நோய்களுக்கு மருந்து மட்டுமல்ல, இறைநம்பிக்கையும் ஒரு ஆற்றல் என்பதற்கு சான்றாக இத்தலங்கள் திகழ்கின்றன.
சென்னையிலிருந்து சுமார் 33 கிலோமீட்டர் தொலைவில் உள்ள திருநின்றவூரில் அருள்பாலிக்கும் இறைவன் இருதயாலீஸ்வரர். இதய நோயால் பாதிக்கப்பட்டவர்கள் இங்கு வந்து மனமார வேண்டினால் நலம் கிடைக்கும் என்பது பக்தர்களின் உறுதியான நம்பிக்கை.

கன்னியாகுமரி மாவட்டம் நாகர்கோவில் அருகிலுள்ள மண்டைக்காடு பகவதி அம்மன் ஆலயம், தலைவலி தீர்க்கும் சக்தித் தலமாகப் போற்றப்படுகிறது. அன்னைக்கு பச்சரிசி மாவு, சர்க்கரை, வெல்லம் சேர்த்து தயாரிக்கும் ‘மண்டையப்பம்’ நைவேத்தியம் செலுத்தினால் தீராத தலைவலியும் குறையும் என கூறப்படுகிறது.
நாமக்கல் மாவட்டம் ராசிபுரத்தில் உள்ள நித்திய சுமங்கலி மாரியம்மன் கோவில், கண் நோய்களுக்கு பரிகாரத் தலமாக விளங்குகிறது. அம்மனுக்கு ‘கண்மலர்’ வாங்கி சாற்றி வழிபட்டால் கண் தொடர்பான பிரச்சனைகள் நீங்கும் என்ற நம்பிக்கை நிலவுகிறது.
திருவண்ணாமலை மாவட்டம் சந்தவாசலில் அமைந்துள்ள கங்கையம்மன் கோவில், தீர்த்தத்தின் மகிமைக்காகப் பிரசித்தி பெற்றது. அன்னைக்கு செய்யப்படும் அபிஷேகத் தீர்த்தத்தைப் பிரசாதமாக எடுத்துக்கொண்டால் நீண்டநாள் நோய்களும் குணமாகும் என பக்தர்கள் நம்புகின்றனர்.
தென்காசி மாவட்டம் சங்கரன்கோவில் கோமதியம்மன் ஆலயத்தில், அம்மன் சன்னிதி முன்பாக அமைந்துள்ள ஸ்ரீசக்கர பீடத்தில் மனநலம் பாதிக்கப்பட்டவர்கள் தொடர்ந்து 40 நாட்கள் அமர்ந்து வழிபட்டால் மன அமைதி கிடைத்து நலம்பெறலாம் என்று கூறப்படுகிறது.
திருவள்ளூர் மாவட்டம் மணவூர் கிராமத்தில், இயற்கைச் சூழலில் அமைந்துள்ள ஆதி காமாட்சி அம்மன் சமேத கற்கடேஸ்வரர் திருக்கோவில், புற்றுநோய் பாதிப்பை குறைக்கும் தலமாகப் போற்றப்படுகிறது. இங்கு தொடர்ந்து 9 திங்கட்கிழமைகள் வந்து இறைவனுக்கு வெல்லம் நைவேத்தியம் செய்து வேண்டினால் நல்ல பலன் கிடைக்கும் என பக்தர்கள் நம்பிக்கையுடன் தரிசனம் செய்கின்றனர்.
இவ்வாறு, ஆன்மிக நம்பிக்கையும் ஆரோக்கிய நலனும் ஒன்றாக இணையும் இந்த தலங்கள், ஆயிரக்கணக்கான பக்தர்களின் இறைநம்பிக்கையின் மையங்களாக விளங்குகின்றன.