கடந்த 2019 ஆம் ஆண்டு பிசிசிஐ தலைவராக முன்னாள் கேப்டன் சவுரவ் கங்குலியும், செயலாளராக ஜெய்ஷாவும் தேர்வு செய்யப்பட்டனர். இந்த நிலையில் அக்டோபர் மாதத்துடன் பிசிசிஐ தலைவர் மற்றும் செயலாளர் பதவி காலம் முடிவடைகிறது.

இந்த நிலையில் மும்பையில் பிசிசிஐயின் ஆலோசனை கூட்டம் நடைபெற்றது. இதில், கங்குலி பிசிசிஐ தலைவர் பதவியில் தொடர விரும்பினார். ஆனால் மற்ற நிர்வாகிகள் அவருக்கு எதிர்ப்பு தெரிவித்தனர். இதனையடுத்து கங்குலிக்கு ஐபிஎல் கமிட்டியின் தலைவர் பதவி வழங்கப்பட்டது. ஆனால், கங்குலி அதனை பெற்று கொள்ள விரும்பவில்லை.

இதில், ஜெய்ஷா மட்டும் 2வது முறையாக பதவி பிசிசிஐ செயலாளராக பதவி தொடர்கிறார். பிசிசிஐ தலைவர் பதவிக்கு இந்திய அணியின் முன்னாள் கிரிக்கெட் வீரர் ரோஜர் பின்னி தேர்வு செய்யப்பட உள்ளதாக கூறப்படுகிறது.

இதனையடுத்து மத்திய உள்துறை அமைச்சர் அமித்ஷாவின் மகனான ஜெய்ஷா, பி.சி.சி.ஐ. செயலாளராக 2-வது முறையாக தொடர முடியும். ஆனால், கங்குலி தலைவராக நீடிக்க முடியாது என்பது பா.ஜ.க.வின் அரசியல் பழிவாங்கும் நடவடிக்கை என குற்றம் சாட்டப்பட்டது.

இந்த நிலையில் ஐசிசி தேர்தலில் போட்டியிட சவுரவ் கங்குலிக்கு அனுமதி அளிக்க வேண்டும் என்று பிரதமர் மோடிக்கு மேற்கு வங்க முதலமைச்சர் மம்தா பானர்ஜி கோரிக்கை விடுத்துள்ளார்.

இது குறித்து பேசிய அவர், சவுரவ் கங்குலி இந்திய அணியின் கேப்டனாக இருந்துள்ளார். அவர் மேற்கு வங்கத்தின் பெருமை மட்டும் கிடையாது. அவர் இந்தியாவின் பெருமையும் கூட அவரை ஏன் இவ்வளவு நியாயமற்ற முறையில் ஒதுக்கப்படுகிறார். கங்குலி மீது கவனம் செலுத்தி அவரை ஐசிசி தேர்தலில் போட்டியிட அனுமதி அளிக்க வேண்டும் என்று பிரதமரிடம் கேட்டுக்கொள்கிறேன் என்று தெரிவித்துள்ளார்.

ஐசிசி தலைவர் பதவிக்கு வரும் 20ம் தேதி வேப்பமனு தாக்கல் செய்யப்பட வேண்டும் என்பது குறிப்பிடத்தக்கது. மேலும் ஐசிசி தலைவர் பதவிக்கு கங்குலி போட்டியிட்டால் கங்குலி எளிதில் வெற்றி பெற வாய்ப்புள்ளதாக கூறப்படுகிறது.

இந்த நிலையில் மேற்கு வங்க முதலமைச்சர் மம்தா பானர்ஜிக்கு பதிலளிக்கும் வகையில் பேசிய மேற்கு வங்காள மாநில சட்டசபை எதிர்க்கட்சி தலைவர் பாஜக சுவேந்து அதிகாரி, நீங்கள் நடிகர் ஷாருக் கானை நீக்கி விட்டு கங்குலியை மேற்கு வங்காள விளம்பர தூதராக்குங்கள் என தெரிவித்துள்ளார்.

மேலும், சவுரவ் கங்குலியின் பதவி காலம் நீடிக்க வேண்டும் என மம்தா பானர்ஜி விரும்பினால், அவரை மேற்கு வங்காளத்தின் விளம்பர தூதராக்குங்கள். விளையாட்டிலும் உங்கள் அரசியலல செய்யாதீர்கள். இதற்கும் பிரதமர் மோடிக்கும் எந்தவித தொடர்பும் இல்லை. இதில் இருந்து அவர் விலகியே இருக்கிறார் என கூறியுள்ளார்.