நடிகர் ரஜினிகாந்தின் மனைவி லதா ரஜினிகாந்த், கடந்த ஜூன் 5ஆம் தேதி ‘மக்கள் மேடை’ என்ற புதிய சமூக இயக்கத்தை தொடங்கியுள்ளார். இந்த இயக்கத்தின் நோக்கம் மற்றும் செயல்பாடுகள் குறித்து அவர் விரிவாக விளக்கம் அளித்துள்ளார்.

இதுகுறித்து பேசிய லதா ரஜினிகாந்த், “மக்கள் மேடை என்பது நாட்டில் உள்ள ஒவ்வொருவரும் தங்கள் நாடு, மாநிலம் மற்றும் வாழும் இடத்தின் மீது கொண்டுள்ள அக்கறை, பொறுப்பு மற்றும் அர்ப்பணிப்பை வெளிப்படுத்தும் ஒரு தளமாக இருக்கும்” என்றார்.

மேலும், இந்தியா ஆழமான ஞானம், வலுவான சமூக அடித்தளம் மற்றும் தலைமுறைகள் கடந்து வந்த வளமான கலாச்சார பாரம்பரியத்தை கொண்ட நாடு என்றும், மக்கள் ஒருவருக்கொருவர் துணையாக வாழ்ந்த பாரம்பரியம் கொண்ட சமூகமாக இருந்தாலும், தற்போது பலர் தனிமைப்படுத்தப்பட்ட வாழ்க்கையை வாழும் நிலை உருவாகியுள்ளதாகவும் அவர் குறிப்பிட்டார்.

தொழில்நுட்ப வளர்ச்சி மற்றும் நவீன வாழ்க்கை முறை சில வகைகளில் மனிதர்களை இயற்கை மற்றும் சமூக உறவுகளிலிருந்து விலக்கி வைத்துள்ளதாகக் கூறிய அவர், “நாம் அடுத்த தலைமுறைக்கு எந்த மாதிரியான சமூகத்தையும், சுற்றுச்சூழலையும், மதிப்புகளையும் விட்டுச் செல்கிறோம் என்பதை சிந்திக்க வேண்டிய நேரம் இது” என்றார்.

விவசாயிகள், கைவினைஞர்கள், குடிசைத் தொழிலாளர்கள், சிறு வணிகர்கள் உள்ளிட்டோருக்கு அதிக வாய்ப்புகளை உருவாக்க வேண்டிய அவசியம் இருப்பதாகவும், பாரம்பரிய மரபுகளையும் உள்ளூர் திறமைகளையும் பாதுகாக்க வேண்டும் என்றும் லதா ரஜினிகாந்த் வலியுறுத்தினார்.

“என் மாநிலத்திற்கும், என் நாட்டிற்கும் நான் எப்படி சேவை செய்ய முடியும்?” என்ற கேள்வியை ஒவ்வொருவரும் தங்களுக்குள் எழுப்பிக் கொள்ள வேண்டும் என்பதே மக்கள் மேடையின் அடிப்படை நோக்கம் என்று அவர் தெரிவித்தார்.

மேலும், தற்கொலை தடுப்பு விழிப்புணர்வு, மாணவர்களுக்கு ஆலோசனை வழங்குதல், சமூக நலன் சார்ந்த திட்டங்கள் உள்ளிட்ட பல்வேறு நடவடிக்கைகளை மக்கள் மேடை முன்னெடுக்கவுள்ளதாகவும் கூறினார். பொது நலனுக்காக மக்களின் திறமை, அறிவு, அனுபவம் மற்றும் ஆற்றலை ஒருங்கிணைப்பதே இந்த இயக்கத்தின் முக்கிய இலக்கு என்றும் அவர் விளக்கினார்.

சமூகப் பொறுப்புணர்வை வளர்க்கும் நோக்கில் தொடங்கப்பட்டுள்ள இந்த முயற்சி, எதிர்காலத்தில் பல்வேறு சமூக நலத் திட்டங்களின் மூலம் மக்களுடன் இணைந்து செயல்படும் என எதிர்பார்க்கப்படுகிறது.