தமிழக சட்டமன்றத் தேர்தலில் வெற்றி பெற்று ஆட்சியைப் பிடித்த தமிழக வெற்றிக் கழகம் (தவெக) தலைமையிலான அரசு, நிர்வாக நடவடிக்கைகளுடன் ஊடகத் துறையிலும் தனது இருப்பை வலுப்படுத்தத் திட்டமிட்டு வருவதாக தகவல்கள் வெளியாகியுள்ளன.

மத்திய அரசின் காப்புரிமை, வடிவமைப்பு மற்றும் வர்த்தக முத்திரைத் துறையில் “வெற்றி” (VETRI) என்ற பெயரில் செயற்கைக்கோள் தொலைக்காட்சி மற்றும் டிஜிட்டல் ஒளிபரப்புக்கான வர்த்தக முத்திரை பதிவு விண்ணப்பம் செய்யப்பட்டுள்ளதாக கூறப்படுகிறது. இந்திய அறிவுசார் சொத்துரிமை தளத்தில் வெளியான தகவலின்படி, தகவல் தொடர்பு மற்றும் ஒளிபரப்பு சேவைகளுக்கான Class 38 பிரிவின் கீழ் இந்த விண்ணப்பம் பதிவு செய்யப்பட்டுள்ளதாகத் தெரிவிக்கப்பட்டுள்ளது.

இந்த தகவல் வெளியானதைத் தொடர்ந்து, அரசியல் மற்றும் ஊடக வட்டாரங்களில் பல்வேறு விவாதங்கள் எழுந்துள்ளன. “வெற்றி” என்ற பெயரில் தொடங்கப்பட உள்ள இந்த சேனல், தவெகவின் அதிகாரப்பூர்வ ஊடக தளமாக இருக்கலாம் என்ற ஊகங்களும் பரவி வருகின்றன.

கட்சி வட்டாரங்களில் பேசப்படுவதாவது, தமிழகத்தின் முக்கிய அரசியல் கட்சிகள் பலவும் தங்களது கருத்துகள் மற்றும் கொள்கைகளை மக்களிடம் கொண்டு செல்ல தனித்தனி ஊடகங்களை பயன்படுத்தி வருகின்றன. அதேபோல், அரசின் திட்டங்கள், மக்கள் நல நடவடிக்கைகள் மற்றும் முதலமைச்சரின் செயல்பாடுகளை நேரடியாக மக்களிடம் கொண்டு செல்லும் நோக்கில் ஒரு ஊடக தளம் அவசியம் என தவெக கருதுவதாக கூறப்படுகிறது.

மேலும், கடந்த சில மாதங்களாகவே புதிய சேனல் தொடங்குவதற்கான ஆரம்பகட்ட பணிகள் அமைதியாக நடைபெற்று வந்ததாகவும், ஊடகத் துறையைச் சேர்ந்த நிபுணர்கள் மற்றும் தொழில்நுட்ப வல்லுநர்களைத் தேர்வு செய்யும் பணிகளும் முன்னெடுக்கப்பட்டதாகவும் தகவல்கள் தெரிவிக்கின்றன.

சமீபத்தில் மாநில வளர்ச்சிக்கான “வெற்றித் தமிழகம்” என்ற தொலைநோக்கு ஆவணத்தை அரசு வெளியிட்டிருந்தது. இதன் பின்னணியில் “வெற்றி” என்ற பெயரில் சேனல் தொடங்கப்படுவது அரசின் பிராண்டிங் முயற்சியின் ஒரு பகுதியாக இருக்கலாம் என அரசியல் விமர்சகர்கள் கருதுகின்றனர்.

அதேநேரத்தில், இந்த சேனல் தொடர்பாக தவெக அல்லது அரசு தரப்பில் இதுவரை எந்த அதிகாரப்பூர்வ அறிவிப்பும் வெளியாகவில்லை. மத்திய தகவல் மற்றும் ஒளிபரப்பு அமைச்சகத்தின் (MIB) அனுமதிகள் உள்ளிட்ட நடைமுறைகள் நிறைவடைந்த பின்னரே திட்டம் குறித்து தெளிவான தகவல்கள் வெளியாகும் என்று எதிர்பார்க்கப்படுகிறது.

இதற்கிடையில், புதிய சேனல் தொடங்கப்பட்டால் அது தமிழக ஊடகத் துறையிலும் அரசியல் தகவல் பரிமாற்றத்திலும் புதிய மாற்றங்களை ஏற்படுத்தக்கூடும் என்ற கருத்தும் எழுந்துள்ளது. அரசியல் கட்சிகளின் சொந்த ஊடகங்களின் வரிசையில் “வெற்றி” தொலைக்காட்சி இணைகிறதா என்பது வரவிருக்கும் மாதங்களில் தெளிவாகும்.