திமுகவில் மாவட்ட மறுசீரமைப்பு நடவடிக்கைகள் தீவிரமடைந்துள்ள நிலையில், முன்னாள் அமைச்சர் செந்தில் பாலாஜிக்கு மட்டும் கட்சித் தலைமை தரப்பில் சிறப்பு வாய்ப்பு வழங்கப்பட்டுள்ளதாக தகவல்கள் வெளியாகியுள்ளன. கரூர் அல்லது கோவை ஆகிய இரு மாவட்டங்களில் எந்தப் பொறுப்பு வேண்டும் என்பதை செந்தில் பாலாஜியே தேர்வு செய்து தெரிவிக்கலாம் என முதலமைச்சரும், திமுக தலைவருமான மு.க.ஸ்டாலின் கூறியுள்ளதாக கட்சி வட்டாரங்களில் பேசப்படுகிறது.

திமுகவில் நிர்வாக ரீதியான மாற்றங்களை மேற்கொண்டு, நீண்ட காலமாக பொறுப்புகளில் இருக்கும் சீனியர்களுக்கு பதிலாக இளைஞர்களுக்கு அதிக வாய்ப்புகளை வழங்க ஸ்டாலின் முடிவு செய்துள்ளதாக கூறப்படுகிறது. இதன் ஒரு பகுதியாக, 78 ஆக இருந்த திமுகவின் வருவாய் மாவட்டங்களை 110 ஆக பிரித்து புதிய அமைப்பு உருவாக்கப்பட்டுள்ளது.

பெரும்பாலான இடங்களில் இரண்டு சட்டமன்றத் தொகுதிகளுக்கு ஒரு மாவட்டச் செயலாளர் என்ற அடிப்படையில் மாவட்டங்கள் பிரிக்கப்பட்டுள்ளதாக தகவல்கள் தெரிவிக்கின்றன.

மேலும், 70 வயதைக் கடந்த 13 முன்னாள் அமைச்சர்கள் மற்றும் ஏற்கனவே மூன்று முறை மாவட்டச் செயலாளர் பொறுப்பில் இருந்த 4 பேர் உள்ளிட்ட சில சீனியர்கள் தற்போது கட்சிப் பொறுப்புகளை இழக்கும் நிலை ஏற்பட்டுள்ளதாக கூறப்படுகிறது.

இதுதொடர்பாக சில மூத்த நிர்வாகிகள் ஸ்டாலினை நேரில் சந்தித்து தங்களது அதிருப்தியை தெரிவித்ததாகவும், ஆனால் கட்சியின் எதிர்கால நலன் மற்றும் தேர்தல் பணிகளை கருத்தில் கொண்டு இந்த மாற்றங்களை அனைவரும் ஏற்றுக்கொள்ள வேண்டும் என்ற வகையில் ஸ்டாலின் திட்டவட்டமாக இருப்பதாகவும் தகவல்கள் வெளியாகியுள்ளன.

இந்த சூழலில்தான் செந்தில் பாலாஜியின் விவகாரம் திமுகவுக்குள் முக்கியத்துவம் பெற்றுள்ளது.இதுவரை கரூர் மாவட்டச் செயலாளராக இருந்த செந்தில் பாலாஜியின் அரசியல் செயல்பாடுகள் கரூரை மையமாகக் கொண்டிருந்தன. தற்போது மாவட்ட மறுசீரமைப்பில் கரூர் மாவட்டம் கிழக்கு, மேற்கு என இரண்டாக பிரிக்கப்பட்டுள்ளதாக கூறப்படுகிறது.

அதே நேரத்தில், செந்தில் பாலாஜி கோவை தெற்கு தொகுதியின் எம்.எல்.ஏ.வாகவும் உள்ளார். இதனால் அவர் இனி எந்தப் பகுதியில் கட்சி பொறுப்பை ஏற்க வேண்டும் என்ற கேள்வி எழுந்துள்ளது.

இந்த நிலையில், “கரூர் வேண்டுமா? கோவை வேண்டுமா? உங்களுக்கு எந்த மாவட்டம் வேண்டும் என்பதை நீங்களே தேர்வு செய்து சொல்லுங்கள்” என்ற வகையில் ஸ்டாலின் தரப்பில் செந்தில் பாலாஜிக்கு வாய்ப்பு வழங்கப்பட்டுள்ளதாக தகவல்கள் தெரிவிக்கின்றன.

திமுகவின் மாவட்ட மறுசீரமைப்பில் பல சீனியர்களின் கட்டுப்பாட்டில் இருந்த பகுதிகள் பிரிக்கப்பட்டு, அவர்களது அதிகாரம் குறைக்கப்படும் சூழலில், செந்தில் பாலாஜிக்கு மட்டும் மாவட்டத்தை தேர்வு செய்யும் வாய்ப்பு வழங்கப்படுவதாக கூறப்படுவது கட்சிக்குள் ஆச்சரியத்தை ஏற்படுத்தியுள்ளதாக தெரிகிறது.தற்போது செந்தில் பாலாஜி முன் முக்கியமான அரசியல் முடிவு இருப்பதாக கூறப்படுகிறது.

கரூர் தொகுதியில் விரைவில் இடைத்தேர்தல் நடைபெற வாய்ப்புள்ளதாக அரசியல் வட்டாரங்களில் எதிர்பார்ப்பு நிலவி வருகிறது. இதனால் கரூர் மாவட்டப் பொறுப்பை தேர்வு செய்தால், அங்கு நடைபெறவிருக்கும் தேர்தல் பணிகளை நேரடியாக ஒருங்கிணைக்க முடியும் என்ற கணக்கு இருக்கலாம்.

மறுபுறம், கோவை தெற்கு தொகுதியின் எம்.எல்.ஏ.வாக இருக்கும் செந்தில் பாலாஜி, கொங்கு மண்டலத்தில் தனது அரசியல் செல்வாக்கை மேலும் வளர்த்துக்கொள்ள கோவை பகுதியை தேர்வு செய்வது எதிர்காலத்திற்கு சாதகமாக இருக்கும் என்றும் அவரது தரப்பில் ஆலோசனை நடைபெறுவதாக கூறப்படுகிறது.

இதனால், கரூரில் தேர்தல் ரீதியான முக்கியத்துவத்தை கருத்தில் கொள்வதா அல்லது கோவையை மையமாக வைத்து கொங்கு மண்டலத்தில் தனது அரசியல் தளத்தை விரிவுபடுத்துவதா என்ற இரு வாய்ப்புகளையும் செந்தில் பாலாஜி பரிசீலித்து வருவதாக தகவல்கள் தெரிவிக்கின்றன.

கடந்த காலங்களில் செந்தில் பாலாஜிக்கும் திமுக தலைமைக்கும் இடையே கருத்து வேறுபாடுகள் இருப்பதாக அரசியல் வட்டாரங்களில் பல்வேறு தகவல்கள் பேசப்பட்டு வந்தன.

ஆனால், தற்போது மாவட்ட மறுசீரமைப்பில் செந்தில் பாலாஜிக்கு தனிப்பட்ட முறையில் தேர்வு செய்யும் வாய்ப்பு வழங்கப்பட்டுள்ளதாக வெளியாகியுள்ள தகவல், தலைமைக்கும் அவருக்கும் இடையேயான உறவு குறித்த புதிய விவாதத்தை ஏற்படுத்தியுள்ளது.

கட்சியின் பல சீனியர்களுக்கு கட்டுப்பாடுகள் விதிக்கப்பட்டுள்ள நிலையில், செந்தில் பாலாஜிக்கு மட்டும் கரூர் அல்லது கோவை என முக்கியமான இரண்டு அரசியல் மையங்களில் ஒன்றை தேர்வு செய்யும் வாய்ப்பு வழங்கப்பட்டுள்ளதாக கூறப்படுவது, திமுக தலைமையின் தேர்தல் கணக்கில் அவருக்கு இன்னும் முக்கியத்துவம் இருப்பதையே காட்டுகிறதா என்ற கேள்வியும் எழுந்துள்ளது.

எனவே, செந்தில் பாலாஜி இறுதியாக கரூரை தேர்வு செய்கிறாரா அல்லது கோவையை தேர்வு செய்கிறாரா என்பதுதான் தற்போது திமுக வட்டாரங்களில் எதிர்பார்ப்பை ஏற்படுத்தியுள்ள முக்கிய அரசியல் நகர்வாக உள்ளது.