நாம் வழக்கமாக செய்வது தேங்காய், தக்காளி அல்லது காரச் சட்னி தான். ஆனால், பூண்டு மற்றும் தயிர் சேர்த்து செய்யப்படும் இந்த சட்னி முற்றிலும் வேறுபட்ட சுவை அனுபவத்தை தரும். செரிமானத்தை மேம்படுத்தும் பூண்டும், உடலுக்கு குளிர்ச்சி தரும் தயிரும் சேரும்போது, நாவை கவரும் ஒரு புதிய ருசி உருவாகிறது. மிக குறைந்த நேரத்தில், வெறும் 5 நிமிடங்களில் தயாரிக்கக்கூடிய இந்த சட்னி, பிஸியான காலையிலே சிறந்த தேர்வாகும்.
தேவையான பொருட்கள்:
பூண்டு, பச்சை மிளகாய், தயிர், சீரகம், பெருங்காயத் தூள், மஞ்சள் தூள், மல்லித்தூள், உப்பு, எண்ணெய், கறிவேப்பிலை

செய்முறை:
முதலில் தோல் நீக்கிய பூண்டு மற்றும் பச்சை மிளகாயை மிக்ஸியில் தண்ணீர் சேர்க்காமல் கொரகொரப்பாக அரைத்துக் கொள்ளவும். இது சட்னியின் சுவையை மேலும் அதிகரிக்கும்.பின்னர் ஒரு வாணலியில் எண்ணெய் ஊற்றி காய்ந்ததும், சீரகம் மற்றும் பெருங்காயத் தூள் சேர்த்து தாளிக்கவும்.

அதில் கறிவேப்பிலை சேர்த்து மணத்தை அதிகரிக்கலாம்.அதன் பின் அரைத்த பூண்டு-மிளகாய் விழுதை சேர்த்து, அதன் பச்சை வாசனை நீங்கும் வரை மிதமான தீயில் வதக்கவும். பூண்டு நன்றாக வதங்கியதும், மஞ்சள் தூள், மல்லித்தூள் மற்றும் உப்பு சேர்த்து ஒரு நிமிடம் கிளறவும்.இப்போது தீயை குறைத்து, ஒரு கப் தயிரை சேர்த்து மெதுவாக கலக்கவும்.

தயிர் மசாலாவுடன் நன்றாக கலந்து, ஒரு முறை கொதித்தவுடன் அடுப்பை அணைத்துவிட வேண்டும். அதிக நேரம் கொதிக்கவிட்டால் தயிர் பிரிந்து போகும் என்பதால் கவனம் அவசியம்.

இவ்வாறு தயாராகும் தயிர்-பூண்டு சட்னி, இட்லி, தோசை, ஆப்பம் அல்லது சப்பாத்தி ஆகியவற்றுடன் அட்டகாசமான சுவையை வழங்கும். பூண்டின் சுறுசுறுப்பு காரத்துக்கும், தயிரின் மென்மையான புளிப்புக்கும் இடையிலான சமநிலை, இந்த சட்னியை ஒருமுறை சுவைத்தால் மறக்க முடியாததாக மாற்றும்.