'சித்திரம் பேசுதடி', 'வெயில்', 'அசல்' எனத் தனது முத்திரை பதித்த நடிப்பால் தமிழ் ரசிகர்களைக் கட்டிப்போட்ட பாவனா, ஒரு சிறிய இடைவெளிக்குப் பிறகு மீண்டும் கோலிவுட் திசை நோக்கித் தனது கவனத்தைத் திருப்பியுள்ளார்.

தற்போது சுவாரசியமான கதைகளைத் தேர்வு செய்து வரும் அவர், விரைவில் நேரடித் தமிழ்ப் படங்களில் தோன்றுவார் என எதிர்பார்க்கப்படுகிறது.இதற்கிடையில், பாவனாவின் திரைப்பயணத்தில் 90-வது மைல்கல்லாக உருவாகியுள்ள 'அனோமி: தி ஈக்வெஷன் ஆப் டெத்' (Anomy: The Equation of Death) திரைப்படம் விரைவில் திரையரங்குகளை அலங்கரிக்கவுள்ளது.

விறுவிறுப்பான கிரைம் திரில்லர் பாணியில் உருவாகியுள்ள இப்படத்தில், பாவனா ஒரு தீர்க்கமான தடயவியல் நிபுணராக (Forensic Expert) மிரட்டியுள்ளார். ரியாஸ் மரத் இயக்கியுள்ள இப்படத்தில் ரகுமான், விஷ்ணு அகஸ்த்யா உள்ளிட்ட முன்னணி நட்சத்திர பட்டாளமே இணைந்து நடித்துள்ளனர்.

தனது திரைப் பயணம் குறித்துப் பேசிய பாவனா, "தரமான கதைகளுக்கே நான் எப்போதும் முன்னுரிமை அளிக்கிறேன். அந்த வகையில், பான் - இந்தியா படமாக உருவாகியுள்ள 'அனோமி' எனக்கு ஒரு மிகச்சிறந்த அனுபவம்.

என் மீதான நம்பிக்கையையும் வலிமையையும் கொண்டு மனதுக்கு நெருக்கமான கதாபாத்திரங்களைச் செதுக்கி வருகிறேன். 'யாராலும் எளிதில் கணித்துவிட முடியாத ஒரு திரை ஆளுமையாக' எனது நீண்ட நெடிய கலைப்பயணம் தொடரும்" எனத் தெம்பாகக் குறிப்பிட்டுள்ளார்.