தூத்துக்குடி மாவட்டம் விளாத்திகுளம் அருகிலுள்ள மேல்மாந்தை மற்றும் அதனைச் சுற்றி உள்ள பகுதிகளில், சுமார் 1500 ஏக்கர் நிலங்களில் நெல், வெங்காயம், மிளகாய் உள்ளிட்ட முக்கியப் பயிர்கள் பயிரிடப்பட்டுள்ளன. ஆனால் கடந்த சில ஆண்டுகளாக அப்பகுதி விவசாயிகள் சந்தித்து வரும் பிரச்சனை,நீர்வரத்து ஓடைகளின் தனியார் ஆக்கிரமிப்பு,இப்போது மழையால் தீவிரமாக வெடித்துள்ளது.

அப்பகுதியில் உள்ள முக்கிய நீர்வரத்து பாதைகளை, சில தனியார் உப்பள நிறுவனங்கள் சட்டவிரோதமாக ஆக்கிரமித்ததோடு, தங்களது உற்பத்தி தேவைக்கேற்ப தண்ணீர் செல்லும் வழிகளை மூடி, தற்காலிக பாலங்களையும் அமைத்துள்ளனர் என விவசாயிகள் கொந்தளித்து தெரிவிக்கின்றனர்.

இதன் விளைவாக, தொடர்ந்த மழையில் இயல்பாக பாய வேண்டிய நீர், பாயாமல் விவசாய நிலங்களுக்கே திரும்பி, பல ஏக்கர் நிலங்களில் பயிர்கள் நீரில் மூழ்கி அழுகும் நிலையிற்கு சென்றுள்ளதாக விவசாயிகள் வேதனை வெளியிடுகின்றனர். “இது புதிய பிரச்சனை இல்லை; ஆண்டுதோறும் மழை வந்தால் இதே கதை,” என அவர்கள் வருத்தப்படுகின்றனர்.

நீர்வரத்து ஓடைகள் ஆக்கிரமிப்பு செய்யப்பட்டுள்ளதைப் பற்றி பலமுறை அரசு அதிகாரிகளிடம் புகார் கூறியிருந்தாலும், இதுவரை எந்தச் சிறப்பு நடவடிக்கையும் எடுக்கப்படாததால், விவசாயிகள் கடும் அதிருப்தியடைந்துள்ளனர்.இந்த முறை, இரண்டு நாட்கள் பெய்த மழைதான் பயிர்களை பெரும்பாலும் நாசமாக்கிய நிலையில், ஆத்திரமடைந்த விவசாயிகள், உப்பள ஆக்கிரமிப்புகளை ஜே.சி.பி. எந்திரங்களால் சுயமாக அகற்ற முயன்றதும் நிலைமை பரபரப்பாகி விட்டது.

இவற்றைப் பற்றி தகவல் அறிந்த காவல்துறை அதிகாரிகள் அவசரமாக சம்பவ இடத்துக்கு சென்று, துறை அதிகாரிகளுடன் பேசிய பின்னர், “உப்பள ஆக்கிரமிப்புகளை விரைவில் அகற்ற நடவடிக்கை எடுக்கப்படும்” என்று விவசாயிகளுக்கு உறுதியளித்தனர். இதனால் விவசாயிகள் அமைதியாக அங்கிருந்து சென்றனர்.

தற்போது, எஞ்சியுள்ள பயிர்களாவது காப்பாற்ற வேண்டும் என்ற விண்ணப்பத்துடன், “டிசம்பர் மழை முழுவதும் தாக்குவதற்கு முன்பே ஆக்கிரமிப்புகளை அகற்றிட நடவடிக்கை எடுக்கவேண்டும்” என மாவட்ட கலெக்டருக்கு விவசாயிகள் இறுதி கோரிக்கை வைத்துள்ளனர்.