இந்தியர்களின் இதயத்துடிப்பில் தங்கத்தின் இடம் தனித்துவமானது.திருமணம், விழா, பிறந்தநாள், எந்த நிகழ்ச்சியும் இருந்தாலும்தான் தங்க நகை பரிசுகள் பளபளக்கும். செல்வத்தின் அடையாளமாகவும், பரம்பரையாகவும் தங்கத்தை சேமிப்பது நம் நாட்டின் நீண்டநாள் பழக்கம்.ஆனால், ஒரு கேள்வி பலரையும் குழப்புகிறது.வீட்டில் எவ்வளவு தங்கம் வைத்திருக்கலாம்? அதற்கான வருமான வரி விதிகள் என்ன?இதை தெளிவுபடுத்தி வருமான வரித்துறை வெளியிட்ட தகவல் தற்போது சமூக வலைதளங்களில் வைரலாகி வருகிறது.

மேலும், வருமான வரித்துறையின் விளக்கப்படி, ஒருவரிடம் எவ்வளவு தங்கம் இருந்தாலும், அதன் மூல ஆதாரத்தை நிரூபிக்க முடிந்தால், அதில் எந்த குற்றமும் இல்லை.அதாவது, நீங்கள் வாங்கிய தங்கத்திற்கு ரசீது, பரிசாக பெற்றதற்கு பரிசளிப்பு கடிதம், அல்லது பரம்பரை வழியாக வந்ததற்கு சான்றுகள் இருந்தால், எவ்வளவு தங்கம் வைத்திருந்தாலும் அது சட்டபூர்வமானதே.ஆனால் பலர் தங்கத்தின் ஆதார ஆவணங்களை வைத்திருக்காமல் இருப்பது வழக்கம்.அப்படிப்பட்ட சூழலில் வருமான வரி அதிகாரிகள் சோதனை மேற்கொண்டால் சிக்கல்கள் உருவாகலாம்.அதனால், வருமான வரித்துறை “பாதுகாப்பான அளவு” எனக் கருதி சில வழிகாட்டுதல்களை வழங்கியுள்ளது.
திருமணமான பெண்கள்: அதிகபட்சம் 500 கிராம் (சுமார் 62½ பவுன்) வரை தங்கம் வைத்திருக்கலாம்.
திருமணம் ஆகாத பெண்கள்: 250 கிராம் (31.25 பவுன்) வரை வைத்திருக்கலாம்.
ஆண்கள் (திருமணமான / ஆகாத): 100 கிராம் (12½ பவுன்) வரை தங்கம் வைத்திருந்தால் பிரச்சனை இல்லை.
இவை அனைத்தும் “வழக்கமான குடும்ப நகைகள்” என கருதப்படும்.ஒரு குடும்பத்தில் எத்தனை பேர் உள்ளார்களோ, அந்த எண்ணிக்கைக்கு ஏற்ற அளவு தங்கம் ஏற்றுக்கொள்ளப்படும்.அதற்கு மேலாக தங்கம் இருந்தாலும், அதன் வாங்கிய மூலத்தை நிரூபிக்க முடிந்தால் சட்டம் பிரச்சனை செய்யாது.
ஆனால், ஆவணங்கள் இல்லாமல் பெருமளவில் தங்கம் வைத்திருந்தால், அது கணக்கில் இல்லாத வருமானம் என கருதி வருமான வரித்துறை நடவடிக்கை எடுக்கும்.மேலும், இதில் தங்கக் கட்டிகள், நாணயங்கள், நகைகள்,எல்லாமே சேர்த்து கணக்கிடப்படும் என்பதை நினைவில் கொள்ள வேண்டும்.
எனவே, திருமண நகைகள், பரிசுகள், பரம்பரை தங்கம் ஆகியவற்றிற்கான ஆவணங்களை வைத்திருப்பது நல்லது.