சென்னை வானிலை ஆய்வு மையம் வெளியிட்டுள்ள சமீபத்திய அறிவிப்பில், “மோந்தா” புயல் தற்போது தீவிர புயலாக வலுப்பெற்று, ஆந்திரக் கடலோரத்தை நோக்கி வேகமாக நகர்ந்து வருவதாக தெரிவிக்கப்பட்டுள்ளது.நேற்று (27-10-2025) காலை தென்மேற்கு மற்றும் மத்திய மேற்கு வங்கக்கடல் பகுதிகளில் உருவான இந்த புயல், இன்று (28-10-2025) காலை 5.30 மணியளவில் தீவிர புயலாக வலுப்பெற்றது.

காலை 8.30 மணிக்கு, இது மசூலிப்பட்டினத்திலிருந்து 160 கி.மீ. தெற்கே, காக்கிநாடாவிலிருந்து 240 கி.மீ. தென்கிழக்கே, விசாகப்பட்டினத்திலிருந்து 320 கி.மீ. தெற்கே நிலைகொண்டது.இது தற்போது வடக்கு–வடமேற்கு திசையில் நகர்ந்து, இன்று மாலை அல்லது இரவில் ஆந்திராவின் காக்கிநாடா அருகே (மசூலிப்பட்டினம்–கலிங்கப்பட்டினம் இடையே) கடலைக் கடக்கக்கூடும் என வானிலை மையம் எச்சரித்துள்ளது. அச்சமயத்தில், காற்றின் வேகம் மணிக்கு 90–110 கிலோமீட்டர் வரை வீசக்கூடும் என்று கூறப்பட்டுள்ளது. மேலும், அரபிக்கடலில் நிலவும் காற்றழுத்த தாழ்வு மண்டலம் வடகிழக்குத் திசையில் நகர்ந்து வருவதாகவும், அடுத்த 36 மணி நேரத்தில் தீவிரமடைய வாய்ப்புள்ளதாகவும் வானிலை மையம் தெரிவித்துள்ளது.

தமிழகம் & புதுச்சேரிக்கான வானிலை:
இன்று மாநிலத்தின் பல பகுதிகளில் இடி, மின்னலுடன் கூடிய லேசானது முதல் மிதமான மழை பெய்யலாம். குறிப்பாக, திருவள்ளூர், சென்னை, செங்கல்பட்டு, காஞ்சிபுரம், ராணிப்பேட்டை, தேனி, தென்காசி, திருநெல்வேலி (மலைப்பகுதிகள்), கன்னியாகுமரி ஆகிய மாவட்டங்களில் கன முதல் மிக கனமழை ஏற்படும் வாய்ப்பு அதிகம்.கடலோர பகுதிகளில் மணிக்கு 50 கி.மீ. வரை பலத்த காற்று வீசக்கூடும் எனவும் எச்சரிக்கப்பட்டுள்ளது.
சென்னை மற்றும் புறநகர் பகுதிகளுக்கான வானிலை:
இன்று வானம் முழுவதும் மேகமூட்டத்துடன் காணப்படும். நகரின் சில பகுதிகளில் இடி, மின்னலுடன் கூடிய மிதமான முதல் கனமழை பெய்யக்கூடும்.
அதிகபட்ச வெப்பநிலை: 25°C
குறைந்தபட்ச வெப்பநிலை: 22°C–23°C
மோந்தா புயலின் தாக்கம் காரணமாக, நேற்று மாலை முதலே சென்னை மற்றும் சுற்றுவட்டாரங்களில் தீவிர மழை வெள்ளம் போல் பொழிகிறது.
அடுத்த 3 மணி நேரத்திற்குள் 13 மாவட்டங்களில் மழை பெய்யும் என சென்னை வானிலை மையம் எச்சரித்துள்ளது. அந்த மாவட்டங்கள்,"காஞ்சிபுரம், கன்னியாகுமரி, ராணிப்பேட்டை,சென்னை, திருவள்ளூர், செங்கல்பட்டு, கோயம்புத்தூர், தென்காசி, தேனி, நீலகிரி, திருநெல்வேலி, திருவண்ணாமலை, வேலூர்".