சேலம் எருமாபாளையம் பகுதியை சேர்ந்த 16 வயது மாணவி, சமீபத்தில் நடைபெற்ற பிளஸ்-2 பொதுத்தேர்வில் வெற்றி பெற்றிருந்ததாக தெரிவிக்கப்படுகிறது. நேற்று முன்தினம் அப்பகுதியில் நடைபெற்ற கோவில் திருவிழாவிற்கு செல்வதற்காக அவர் பைபாஸ் சாலையை கடந்து சென்றுள்ளார்.

அப்போது அவ்வழியாக மோட்டார் சைக்கிளில் வந்த ஒருவர், மாணவியிடம் திடீரென அருவருப்பான வார்த்தைகளில் பேசியதாக தெரிவிக்கப்படுகிறது.

இதனால் அதிர்ச்சி அடைந்த மாணவி, “ஏன் இவ்வாறு பேசுகிறீர்கள்?” என தைரியமாக கேள்வி எழுப்பியுள்ளார்.இதனைத் தொடர்ந்து அந்த நபர், மாணவியிடம் தகாத முறையில் நடந்து கொள்ள முயன்றதாக தெரிவிக்கப்படுகிறது. இதனால் கடும் ஆவேசமடைந்த மாணவி, அந்த நபரின் கன்னத்தில் அறைந்து எதிர்ப்பு தெரிவித்தார்.

பின்னர் மாணவி உரக்க சத்தமிட்டு உதவி கோரியதால், அருகில் இருந்த பொதுமக்கள் உடனடியாக அங்கு திரண்டனர். இதனால் அந்த பகுதியில் பரபரப்பான சூழல் ஏற்பட்டது.

அங்கு கூடியிருந்தவர்களிடம் நடந்த சம்பவத்தை மாணவி விளக்கமாக தெரிவித்ததை அடுத்து, ஆத்திரமடைந்த பொதுமக்கள் அந்த நபரை பிடித்து வைத்து தாக்கியதாக தெரிவிக்கப்படுகிறது. இதில் அந்த நபர் காயமடைந்தார்.

இதுகுறித்து தகவல் அறிந்த அம்மாப்பேட்டை அனைத்து மகளிர் காவலர்கள் சம்பவ இடத்திற்கு விரைந்து சென்று, பொதுமக்கள் பிடித்து வைத்திருந்த நபரை மீட்டு விசாரணை மேற்கொண்டனர்.

அதில் அவர் எருமாபாளையத்தை சேர்ந்த பாலகிருஷ்ணன் (43) என்பதும், வாழப்பாடி தாலுகா பெரிய கிருஷ்ணாபுரத்தில் கிராம நிர்வாக அலுவலராக பணியாற்றி வருவதும் தெரியவந்ததாக தெரிவிக்கப்படுகிறது.

இதனைத் தொடர்ந்து மாணவியின் புகாரின் பேரில் காவலர்கள் போக்சோ சட்டத்தின் கீழ் வழக்குப்பதிவு செய்து, பாலகிருஷ்ணனை கைது செய்ததாக தெரிவிக்கப்படுகிறது.