தமிழகத்தில் சமீபகாலமாக அரசியல் கட்சி நிர்வாகிகள் கட்சி மாறுவது வழக்கமாக மாறியுள்ளது. கடந்த சில வாரங்களாக திமுக நிர்வாகிகள் கட்சி மாறுவதால் பெரும் பரபரப்பு நிலவி வருகிறது. 

திமுக எம்எல்ஏ கு.க.செல்வம், சமீபத்தில் பாஜகவில் இணைந்து அதிர்ச்சியை ஏற்படுத்திய நிலையில், மேலும் சில திமுக எம்எம்ஏக்கள் பாஜகவில் இணைய உள்ளதாக தகவல் வெளியாகி உள்ளது. அதேபோல, அதிமுகவிலிருந்து பாஜகவுக்கு சென்ற நயினார் நாகேந்திரன் மீண்டும் அதிமுகவில் இணைத்துக் கொள்ள தயாராக இருப்பதாக அதிமுக அமைச்சர்கள் கூறிவருகின்றனர். 

வரும் 2021ம் ஆண்டு தமிழக சட்டமன்ற தேர்தலை சந்திக்க உள்ள சூழ்நிலையில் கட்சி விட்டு கட்சி தாவும் நிர்வாகிகளால் தமிழகத்தில் பரபரப்பு நிலவி வருகிறது. இந்நிலையில், திமுக முன்னாள் அமைச்சர் தா.கிருட்டிணனின் மருமகன் புவியரசு என்பவர் பாஜகவில் இணைந்துள்ளார். 

திமுக வின் முன்னாள் அமைச்சர் தா.கிருட்டிணன் அவர்களின் மருமகன் புவியரசு அவர்கள் அவரது ஆதரவாளர்களுடன் பாஜகவில் சேர்ந்துள்ளார். தேசிய நீரோட்டத்தில் தன்னை இணைத்துக் கொண்டுள்ள அவரையும் அவரது ஆதரவாளர்களையும் அன்புடன் வரவேற்கிறேன். pic.twitter.com/hLiJS0AmVD

— H Raja (@HRajaBJP) August 7, 2020

புவியரசு பாஜகவில் இணைந்ததை, பாஜக மாநில தேசிய செயலாளர் H. ராஜா டுவிட்டரில் பதிவிட்டு, வாழ்த்துக்களை தெரிவித்துள்ளார். 2021ஆம் ஆண்டு தேர்தலை எதிகொள்ள, பதவி ஆசை காட்டி அரசியல் பிரமுகர்களை பாஜக தன் பக்கம் இழுப்பதாக  திமுக வட்டாரங்கள் கூறி வருகின்றனர். மேலும், திமுகவில் உள்ள குடும்ப அரசியல் பிடிக்காமலே பலர் வேறு கட்சியில் இணைவதாக அரசியல் வட்டாரங்களில் பேசப்படுகிறது.