தமிழ் சினிமாவின் மிகத் தனித்துவமான இயக்குநர்களில் ஒருவர் சேரன். காலத்தைத் தாண்டி பேசப்படும் ஆட்டோகிராஃப், தவமாய் தவமிருந்து, பாண்டவர் பூமி போன்ற படங்களால் ரசிகர்களின் மனதில் தனித்திடம் பிடித்தவர். சமீபத்தில் ஆட்டோகிராஃப் ரீ-ரிலீஸ் ஆனபோது கூட திரையரங்குகள் ரசிகர்களால் நிரம்பியது இதற்கு சான்று.

கோலிவுட்டில் கே.எஸ்.ரவிக்குமார் மற்றும் சந்தான பாரதி ஆகியோரிடம் உதவி இயக்குநராக பணியாற்றிய சேரன், பாரதி கண்ணம்மா படத்தின் மூலம் இயக்குநராக அறிமுகமானார். தொடர்ந்து பொற்காலம், தேசிய கீதம், வெற்றிக்கொடிகட்டு போன்ற படங்கள் வெற்றி பெற்று அவர் முன்னணி இயக்குநராக உயர்த்தின. ஆட்டோகிராஃப் மற்றும் தவமாய் தவமிருந்து படங்கள் அவரின் கரியரில் மிகப் பெரிய மைல்கற்களாக அமைந்தது. இந்த இரண்டு படங்களும் அவரை ரசிகர்களின் இதயத்தில் நிரந்தரமாக பதித்துவிட்டன.

சமீபத்தில் சென்னையில் நடந்த ஒரு புத்தக வெளியீட்டு விழாவில் கலந்து கொண்ட சேரன், தனது உரையில் காதல் குறித்த ஒரு தன்னிச்சையான கருத்தை பகிர்ந்து அனைவரையும் சிந்திக்க வைத்தார்.

அவர் கூறியதாவது:“சமூகத்தில் ஒரு பெண்ணைத்தான் காதலிக்க வேண்டும் என்பது தவறான புரிதல். எந்த உயிரினத்தின் மேல் நாம் அன்பு வைத்தாலும் அது காதல்தான். காதல் என்பதற்கு நல்லது, கள்ளக்காதல் என்பதாக எதுவும் இல்லை. இவை அனைத்தும் சமூகமே நமக்குச் சுமத்தும் கட்டுப்பாடுகள். யாரைப் பற்றிப் பிரியம் தோன்றுகிறதோ, வாழ்க்கைச் சுமைகளை விட்டு மனதார காதலித்துவிடுங்கள்.”

சேரனின் இந்த உரை, காதல் என்ற உணர்வை சமூக கட்டுப்பாடுகளின் அடிப்படையிலே மதிப்பிடும் பழக்கத்தை கேள்விக்குட்படுத்துவதாக இருப்பதால், ரசிகர்கள் மற்றும் பொதுமக்களிடையே பெரும் கவனத்தை ஈர்த்துள்ளது.