சர்வதேச விண்வெளி நிலையத்தில் வளர்ந்த ஜின்னியா பூ - புகைப்படத்தை வெளியிட்ட நாசா.!!

பல்வேறு நாடுகளின் பங்களிப்பில் விண்வெளியில் அமைக்கப்பட்ட சர்வதேச விண்வெளி நிலையத்தில் நாசா விஞ்ஞானிகள் ஜின்னியா ரக செடியை நட்டு வளர்த்தனர். ஆரஞ்சு வண்ணத்தில் மலர்ந்துள்ள இந்த ஜின்னியாதான் பூமிக்கு அடுத்து மலர்ந்த முதல் மலர் என்பது குறிப்பிடத்தக்கது. 

சர்வதேச விண்வெளி நிலையத்தில் மைக்ரோகிராவிட்டி எனப்படும் நுண்ஈர்ப்பு விசையில் தாவரங்களும் மலர்களும் எப்படி வளர்கின்றன என்பதை விஞ்ஞானிகள் புரிந்துகொள்ளும் வாய்ப்பாக நாசா விஞ்ஞானிகள் இந்த மலர்ச்செடியை வளர்த்துள்ளனர். 

இந்த நிலையில், விண்வெளி நிலையத்தில் வளர்ந்துள்ள ஜின்னியா பூவின் படத்தை நாசா தனது டுவிட்டரில் பகிர்ந்துள்ளது. இதுதொடர்பாக நாசா வெளியிட்டுள்ள அறிக்கையில், "செவ்வாய் கிரகத்திற்குச் செல்வது போன்ற எதிர்கால நீண்ட தூர பயணங்கள் மற்றும் மனிதர்கள் தங்கள் சொந்த உணவைப் பயிரிட வேண்டும். 

ஆகவே, விண்வெளியில் தாவரங்கள் எவ்வாறு வளர்கின்றன என்பதைப் புரிந்துகொள்வது அவசியம். இந்த ஜின்னியா சர்வதேச விண்வெளி நிலையத்தில் காய்கறி வசதியின் ஒரு பகுதியாக சுற்றுப்பாதையில் வளர்க்கப்பட்டது. விஞ்ஞானிகள் 1970-களில் இருந்து விண்வெளியில் தாவரங்களை ஆய்வு செய்து வருகின்றனர். 

சுற்றுப்பாதையில் தாவரங்கள் எவ்வாறு உருவாகின்றன? என்பதைக் கற்றுக்கொள்வது பூமியிலிருந்து பயிர்களை எவ்வாறு வளர்ப்பது என்பதைப் புரிந்துகொள்ள உதவுகிறது. மேலும், சந்திரன், செவ்வாய் மற்றும் அதற்கு அப்பால் நீண்டகால பயணங்களில் புதிய உணவின் மதிப்புமிக்க ஆதாரத்தை வழங்குகிறது" என்றுத் தெரிவித்துள்ளது.